Фото: Маңғыстау облысының әкімдігі
Жаңа білім ошақтарының бірі – Бейнеу ауданы Сам ауылындағы 300 орындық мектеп. Ашылу рәсіміне облыс әкімі Нұрдәулет Қилыбай, ардагерлер, ұстаздар мен ауыл тұрғындары қатысты. Салтанатты жиында өңір басшысы жиналғандарды білім күнімен құттықтап, жаңа мектептердің өңір үшін маңыздылығына тоқталды.
«Мемлекет басшысы білім саласын дамытуға әрқашан айрықша көңіл бөледі. Бүгін пайдалануға беріліп отырған жаңа мектептер – осы қамқорлықтың нақты нәтижесі. Президенттің тапсырмасымен салынған заманауи білім ордалары шалғайда жатқан ауылдарға да жетіп, балалардың сапалы білім алуына мүмкіндік беріп отыр. Бұл білім ордасында шәкірттердің жан-жақты дамуына, мұғалімдердің шығармашылықпен еңбек етуіне барлық жағдай жасалған. Осы шаңырақтан түлеп ұшатын түлектер еліміздің дамуына үлес қосатын білімді де отаншыл азамат болады деп сенемін. Баршаңызды білім күнімен құттықтаймын, жаңа оқу жылы сәтті әрі табысты болсын», деді Нұрдәулет Қилыбай.
Сам ауылындағы жаңа мектепте қазіргі таңда 151 оқушы білім алады, 40 педагог еңбек етеді. Мектеп 27 оқу кабинетімен, 18 қосымша бөлмемен, сондай-ақ химия, биология, информатика, робототехника, STEM, өнер және музыка сыныптарымен қамтылған. Бұдан бөлек, логопед пен психолог кабинеттері, спорт және акт залы, асхана, кітапхана, шеберхана, медициналық бөлме және мұражай бар.
Сонымен қатар жаңа оқу жылы қарсаңында Ақтау қаласының «Рауан» шағын ауданында – 300 орындық, Мұнайлы ауданының Батыр ауылындағы «Самал» шағын ауданында – 1200 орындық, Бейнеу ауылында – 600 орындық және Түпқараған ауданының Сайын-Шапағатов ауылында демеушілердің қолдауымен 1200 орындық мектеп ашылды. Бұл нысандардың іске қосылуы Мұнайлы мен Түпқараған аудандарында үш ауысымды оқытуды толық жойып, Бейнеу ауданындағы апатты мектептің мәселесін шешті.
Жаңа оқу жылында Маңғыстау облысында 157 мектеп жұмысын бастады. Өңірде 213 мыңнан астам оқушы білім алуда. Олардың ішінде 19 мың бала алғаш рет мектеп табалдырығын аттады. Сонымен бірге оқу жылының алғашқы тоқсанында тағы бес жаңа мектеп пайдалануға беріледі.
