Суретті түсірген – Әли ҒАЛЫМ
«Amanat» партиясы Жамбыл облыстық филиалының ұйытқы болуымен Тараз қаласындағы «Қазфосфат» минералды тыңайтқыштар зауытының өндіріс алаңында «Жұмысшы жастар аманаты» тақырыбында форум өткізілді. Бұған дейін «Amanat» партиясы жұмысшы жастардың әлеуметтік мәселесін шешу, олардың кадрлық әлеуетін дамыту мақсатында Үкіметпен бірге «Жұмысшы жастар аманаты» жобасын қолға алған болатын. Бұл форум осы жобаны жүйелі жүзеге асырудың нақты көрінісі деуге толық негіз бар.
Іс-шара барысында сөз сөйлеген Мәжіліс депутаты, «Amanat» партиясы фракциясының мүшесі Мұқаш Ескендіров өз ісінің нағыз маманы атанудың мән-маңызына тоқталып, жастар қауымын ел игілігі жолында еңбек етуге шақырды.
«Елімізде жыл сайын ауқымды жоба жүзеге асырылып жатыр. Оның бірқатары осы Жамбыл облысында қолға алынғаны мәлім. Бұл жобаларды жүйелі түрде жүзеге асыру үшін, әрине, жұмысшы жастар қажет. Еліміздің болашағы жұмысшы мамандық иелерімен тікелей байланысты. Қазірдің өзінде қоғамда өндіріс саласының мамандары ерекше бағаланады. Ал осындай іс-шаралар арқылы белсенді жастарды қолдау ісіне жарқын жол ашылып отыр. Себебі өмірде барлық жетістік тек адал еңбекпен, қажырлы қызметпен келеді», деді М.Ескендіров.
«Жастар рухы» жастар қанатының төрағасы Ақерке Искандерованың айтуынша, ұйым жастарды қолдау мақсатында ауқымды жұмыс атқарған. Мәселен, «Жастарға жұмыс» жобасы аясында еліміздің барлық өңірінде бос жұмыс орындары жәрмеңкесі тұрақты өткізіледі. Таяуда Астанада ұйымдастырылған жәрмеңкеге үш мыңға жетеғабыл адам қатысып, жетпістен астам кәсіпорын 2000-нан астам бос жұмыс орнын ұсыныпты.
Жастар форумында сөз алған өңір басшысының орынбасары Қанатбек Мәдібек облыс аумағында жұмысшы жастарды қолдау мақсатында ауқымды жұмыс атқарылып жатқанын тілге тиек етті.
«Жамбыл облысына инвестиция тарту бағытында жоспарлы жұмыс жүргізіліп жатыр. Алдағы уақытта өңірде 62 инвестициялық жобаны қолға алу көзделіп отыр. Бұл жобалар жүзеге асқан кезде 6 мыңға жуық жұмыс орны ашылады. Жоғары оқу орындары мен колледж түлектерін жыл сайын жұмысқа орналастыруға мүмкіндік туады. Осы орайда өңірдегі жоғары оқу орындарында кадр даярлау жұмысы қолға алынып жатқанын айта кеткен жөн. Біздің басты міндетіміз – кәсіби мамандардың жаңа буынын тәрбиелеу, олардың бойына адалдық, жауапкершілік сынды асыл қасиеттерді сіңіру», деді ол.
Ресми дерекке сенсек, Жамбыл облысында 355 мыңнан астам жас бар. Бұл көрсеткіш өңір тұрғындарының 29,1%-ын құрап отыр. Олардың 41,8%-ы қалада, 58,2%-ы ауылда тұрақтаған. Осы көрсеткішке қарап-ақ елді мекендерде жұмыс істеуге қабілетті жастар жеткілікті екенін бағамдауға болады.
«Біздің кәсіпорында жүздеген маман еңбек етеді. Солардың қатарында еңбек жолымды слесарь ретінде бастап, кейін қазандық операторы, компрессорлық, тоңазытқыш қондырғылары аумағының шебері, қазандық аумағының шебері болып жұмыс істедім. Қазір энергетика ресурстарымен қамтамасыз ету цехы бастығының орынбасары қызметін абыроймен атқарып жүрмін. Осындай ірі өндіріс орнында еңбек ету – жас мамандар үшін зор мәртебе. Компания бізге барынша қолайлы жағдай жасап жатыр. Мұнда кәсіптік машығымызды жетілдіруге қажет барлық мүмкіндік бар. Ұжымымызға білікті, адал жұмысшы жастар қашанда қажет», дейді «Talas investment company» ЖСШ қызметкері, жас маман Бексұлтан Болғанбек.
Ресми дерекке жүгінсек, «Қазфосфат» ЖШС-ға қарасты «Минералды тыңайтқыштар» зауытында 35 жасқа толмаған 1128 жас маман еңбек етеді екен. Олардың өндіріс ошағында жүйелі жұмыс істеуіне кәсіпорын тарапынан барлық жағдай қарастырылған.
ТАРАЗ
