Фотоэкспедиция

Қазақ хандығының 550 жылдығына орай маусым айының 19-ы мен 21-і аралығында Жамбыл-Шу-Мойынқұм аудандарында фотоэкспедиция өт­кізілді. Шараны ұйымдастырушылар  – әл-Фараби атындағы Қазақ ұлттық университетінің журналистика фа­культеті мен «Фотоөнер» қо­ғамдық бір­лестігі. Игі бастамаға қолдау көрсет­кен Жамбыл облысының әкімдігі мен «Нұр Отан» партиясының облыстық филиалы. Фотоэкспедицияның алғашқы күнінде баспасөз мәслихаты өтті. Басқосуды ашқан экспедиция кезінде бірге жүріп, жол көрсеткен «Нұр Отан» партиясы облыстық филиалы төрағасының бірінші орынбасары Масат Әшімұлы шараның ел тарихын танып-білуде маңызы зор екенін тілге тиек етті. Жиын барысында журналистика факультетінің деканы Сағатбек Медеубекұлы облыстың ақпарат саласында еңбек етіп жүрген басшыларына диплом мен сыйлықтар табыс етті. Фотосапарға еліміздің әр өңірінен, Астана, Алматы қалалары мен Маңғыстау, Жамбыл аудандарынан фототілшілер мен жас мамандар қатысты. Сонымен, экспедиция Жамбыл облысы, Тұрар Рысқұлов ауданында орналасқан Ақыртас сарай кешенін фотоға түсіруден басталды. VIII ғасырда іргесі қаланған тасты қала Ақыртас сарай, Керуен сарай, Төрткүл, Қарауыл мұнарасы, обалар сынды сәулеттік-археологиялық кешендерден тұрады. Құрылыс материалдары тас және пішімі малға шөп салатын ақырға ұқсас болғандықтан, Ақыртас деп аталған. Суреттері бірге тасқа қашалып бейнеленген. Бұл таңбалар қазақтың көшпелі халық екенінің тағы бір дәлелі. Жолдың ұзақтығына байланысты фо­тосуретшілер Жайсаң жазығындағы балбал тас мүсіндерді түнгі кезеңде тү­сірді. Мүсіндегі адамның құлағында сыр­ға­сы, қолында қанжары мен құмы­расы бар. Әр тасы тұнған тарих, қасиетті Жам­был жеріндегі фотоэкспедиция қы­зықты жалғасты. Назерке СӘНДІБЕК.