Коллажды жасаған – Қонысбай ШЕЖІМБАЙ, «EQ»
Баспасөз жиынында Ғылым және жоғары білім вице-министрі Динара Щеглова бағдарлама барлық деңгейдегі студенттерді, магистранттарды, жас зерттеушілерді қамтитынын айтты.
«Бірінші кезеңде 650 мың студентті жасанды интеллект негіздеріне, жасанды интеллектіні басқару дағдыларына оқыту көзделген. Қазіргі таңда студенттер курстардан өтіп, сертификат алды. Олар «Huawei», «Coursera», «Astana Hub» және университеттердің жеке бағдарламалары бойынша оқыды. Келесі кезеңдерде – жасанды интеллектіні тереңдетіп оқыту, технологиялық кәсіпкерлік, салалық жобалар әзірлеу және стартаптарды акселерациялау жоспарланған. Осылайша, «AI-Sana» бағдарламасы ЭКСПО аумағында орналасқан «Аlem.ai» халықаралық жасанды интеллект орталығы үшін адам капиталының негізгі көзі болады», деді министрдің орынбасары.
Д.Щеглованың айтуынша, «AI-Sana» бағдарламасының бірінші кезеңі аясында студенттер өтетін негізгі курстар бар. Оқыту «Huawei», «Astana Hub» және «Coursera» сияқты жетекші халықаралық серіктестермен бірлесіп жүзеге асырылып жатыр және бұл жасанды интеллектінің кең бағытын қамтиды. Студенттер аталған курстарды сәтті аяқтағаннан кейін сертификаттар иеленеді. Бүгінгі таңда еліміздің 80 жоғары оқу орнында 137 ЖИ-агент енгізілген, ал тағы 363 ЖИ-агент әзірлеу сатысында тұр. Студенттер әзірлеп жатқан ең танымал ЖИ-агенттерге – ЖИ-қабылдау комиссиясы, ЖИ-чек, ЖИ-прокторинг, ЖИ-лектор, ЖИ-кітапхана, ЖИ-психолог және білім үдерістерінің тиімділігін арттыру мен жоғары оқу орындарының қызметін автоматтандыруға бағытталған өзге де мамандандырылған шешімдер жатады.
«Бұған дейін министрлік «AI-Sana» бағдарламасы аясында Президенттің тапсырмаларын іске асыру бойынша жүйелі жұмыс жүргізгенін атап өткім келеді. Бұған дейін қойылған барлық міндет белгіленген тәртіппен орындалып, алдағы қадамға қажетті негіз дайындалды. Сонымен қатар осы жылы 1 қазанда өткен Кеңесте Мемлекет басшысы жаңа міндеттерді айқындады: «AI-Sana» бағдарламасын одан әрі іске асырып, кадрлық әлеуетті дамыту арқылы маман даярлаудың жаңа кезеңіне көшу; Ғылыми серпілістерге жол ашатын және құзыреттер орталығына айналатын мамандандырылған зерттеу университетін құру; Сапалы цифрлық ресурстар мен заманауи оқыту стандарттарына қолжетімділікті қамтамасыз ететін ұлттық білім платформасын әзірлеу. Осылайша, министрліктің алдағы жұмысы осы стратегиялық бағыттарға сәйкес құрылып, елімізде жасанды интеллект саласын жүйелі түрде дамытуға мүмкіндік береді», деді вице-министр.
Брифингте Жоғары және жоғары оқу орнынан кейінгі білім комитетінің басқарма басшысы Рыскүл Құдыреттулаева бүгінгі таңда жасанды интеллект саласында кадр даярлау шетелдің жетекші университеттерімен бірлесіп жүзеге асып жатқанын айтты.
«Қазақстандағы «Cardiff» университетінде жасанды интеллект орталығы ашылды, сондай-ақ қазіргі таңда 3 жоғары оқу орны нақты серіктестік жобаларды: Қорқыт ата атындағы Қызылорда университеті SeoulTech-пен, Satbayev University City University of Hong Kong-пен, Д.Серікбаев атындағы Шығыс Қазақстан техникалық университеті Лу Бань шеберханасының базасында жүргізіп отыр. Осындай тәжірибе басқа оқу орындарында да дамып келеді. Мәселен, «Astana IT University», Халықаралық ақпараттық технологиялар университеті, т.б», деді Р.Құдыретуллаева.
Оның баяндауынша, жасанды интеллект саласында кадр даярлау және ғылыми зерттеулер жүргізу үшін жоғары оқу орындарында инфрақұрылымды дамытуға ерекше назар аударылып отыр. Жетекші университеттердің базасында ғылым мен практиканы ұштастыратын жасанды интеллект бойынша арнайы орталықтар мен зертханалар құрылды. Бүгінде жасанды интеллект орталықтары еліміздің бірқатар оқу орнында табысты жұмыс істеп жатыр. Сонымен қатар жасанды интеллект бойынша арнайы кафедралар да 4 университетте ашылды. Одан бөлек, ғылыми зертханалар да жұмыс істейді. Назарбаев университетінде «Ақылды жүйелер және жасанды интеллект» деп аталатын арнайы институт былтыр бөлек ғылыми зерттеу институты болып заңды тұлға ретінде қайта құрылды.
Баспасөз конференциясында сөйлеген үшінші спикер Л.Н. Гумилев атындағы ЕҰУ Цифрландыру жөніндегі проректоры Гүлмира Бекманова университетте «AI-Sana» бағдарламасы белсенді түрде жүзеге асырылып жатқанын жеткізді. Оның сөзіне қарағанда, аталған бағдарлама оқу, ғылым және инновацияны біріктіретін экожүйеге айналды. Бұл жасанды интеллект құзыреттерін қалыптастырып қана қоймай, университеттің практикалық міндетін шешуге арналған нақты AI-өнімдерді де әзірлеп жатыр.
