Жаңа орталықтың жалпы ауданы – 724,1 шаршы метрді құрайды. Ғимарат заманауи үлгіде жабдықталған, жастардың шығармашылық және жеке дамуына қажетті барлық жағдай жасалған. Мұнда кеңес беру кабинеттері, коворкинг және «open space» аймағы, шығармашылық студия, демалыс орындары, 3х3 стритбол мен стрит воркаут алаңдары, балалар ойын алаңы және волонтерлар штабы бар.
Өңір басшысы өз сөзінде Мемлекет басшысы Қасым-Жомарт Тоқаевтың бастамасымен елімізде жастар саясатын дамытуға, олардың әлеуетін ашуға және қоғам өміріне белсене араласуына ерекше көңіл бөлініп отырғанын атап өтті.
«Жастар – елдің болашағы. Олардың бастамаларына қолдау көрсету, идеяларын жүзеге асыруға мүмкіндік беру – біздің басты міндетіміз. Жаңа орталық аудан жастарының басын біріктіріп, олардың әлеуетін дамытуға, азаматтық белсенділігін арттыруға қызмет етеді деп сенеміз», деді Нұрдәулет Қилыбай.
Айта кетейік, Қарақия ауданында бүгінде 14 пен 35 жас аралығындағы 11 463 жас бар, бұл аудан халқының 31 пайызын құрайды.
