Іс-шараға Әзербайжан, Беларусь, Қазақстан, Қырғызстан, Ресей, Тәжікстан, Өзбекстан қорғаныс ведомстволарының басшылары және ТМД Қорғаныс министрлері кеңесінің хатшысы қатысты.
Дәстүр бойынша отырыс 28 гвардияшы-панфиловшылар атындағы саябақтағы Мәңгілік алауға гүл шоғын қою рәсімінен басталды. Әскер үйінде қонақтар Әскери-тарихи музейдің экспозициясымен танысты.
Отырысты аша отырып, Қазақстан Қорғаныс министрі авиация генерал-лейтенанты Дәурен Қосанов кездесу күн тәртібіндегі өзекті мәселелер бойынша өзара іс-қимылды одан әрі нығайтуға және сындарлы диалогті жалғастыруға мүмкіндік беретініне сенім білдірді.
Жиын барысында ТМД-ға мүше мемлекеттердің 2025 жылға дейінгі әскери ынтымақтастық тұжырымдамасын іске асыру мәселелері қаралды.
Кеңеске қатысушылар ұлттық армиялардың жауынгерлік қабілетін дамыту мен нығайтудың негізгі бағыттарын талқылап, әскери қызметшілерді даярлау, радиациялық, химиялық және биологиялық қауіпсіздікті қамтамасыз ету салаларындағы тәжірибемен алмасты. Сондай-ақ жеке құрамды тәрбиелеудің маңызды бөлігі ретінде әскери-патриоттық жұмыстың және жауынгерлер ерліктерін есте сақтаудың маңызы аталып өтті.
Отырыс қорытындысында қорғаныс министрлері Кеңестің 2026 жылға арналған жұмыс жоспарына және ынтымақтастықты одан әрі дамыту мен жетілдіруге бағытталған бірқатар құжатқа қол қойды.
