Жұмысқа орналастырылғандардың ең көбі – Түркістан облысында. Онда – 6 мың жас, Қызылордада – 2 300, Жамбыл облысында – 1 700, Ақтөбеде – 1 500, Шымкентте 1 300 азамат «екі қолға – бір күрек» тапты. Айта кетерлігі, еңбекке араласқандардың шамамен 60%-ы – ауыл тұрғындары.
Жастар практикасында ең көп сұранысқа ие мамандықтар – жалпы білім беретін мектеп мұғалімдері мен мектепке дейінгі тәрбиешілер, медицина қызметкерлері, бағдарламашы және заңгер.
– Биыл мен Батыс Қазақстан жоғары медициналық колледжін «Емдеу ісі» мамандығы бойынша тәмамдадым. Оқуды аяқтаған соң бірден мансап орталығына барып, жұмыссыз ретінде тіркелдім. Сол жерде маған жастар практикасы бағдарламасы туралы ақпарат берілді. Шамамен он күннен кейін мені Қаратөбе аудандық ауруханасына тәжірибеден өтуге жіберді. Ал 3 қыркүйектен бастап сол мекемеге тұрақты жұмысқа қабылдандым, – дейді Орал қаласының тұрғыны Эльмар Темір.
Бастаманың игілігін көрген тағы бір жас – Малика Мұсажоджаева. Ол Шымкент политехникалық колледжінде «тоқушы-оператор» мамандығын оқыған. Осы жылы дипломын алып, Жастар практикасының көмегімен кілем фабрикасына жұмысқа орналасқан.
– Фабрикада таңбалау операторы болып еңбек етемін. Әрине, кез келген жасты оқуын аяқтаған соң, «тәжірибесіз қайда жұмысқа орналасамын?» деген сұрақ мазалайтыны анық. Салдарынан көпшілігі мүлдем басқа салаға кетеді. Менің жолым болып, бағдарлама арқылы тәжірибе жинақтап, еңбекке араласып жатырмын. Бағдарлама мерзімі аяқталған соң, осында тұрақты жұмысқа қалып, кәсіби тұрғыдан өскім келеді. Оның үстіне ұжымда өзім секілді жастар көп, – дейді М.Мұсажоджаева.
Еңбек және халықты әлеуметтік қорғау министрлігінің өкілі Анар Бижанованың айтуынша, жұмысқа қабылданған жастарға тәжірибе жинауға көмектесетін арнайы тәлімгерлер бекітіледі.
– Жастар практикасы мамандығы бойынша бастапқы жұмыс тәжірибесін алу мақсатында білім беру ұйымдарының түлектеріне арналған. Оған оқуын аяқтағаннан кейін 5 жыл ішінде 35 жастан аспаған жұмыссыз ретінде тіркелгендер жіберіледі. Ұзақтығы 12 айдан аспайды. Қазір ай сайынғы еңбекақы – орта есеппен 118 мың теңге. Қаржыландыруды Еңбек мобильділігі орталығы «Азаматтарға арналған үкімет» мемлекеттік корпорациясы арқылы жүзеге асырады. Төлем екінші деңгейдегі банктерде ашылған қатысушылардың шоттарына қаражатты аудару жолымен жұмыс беруші ұсынған мәліметтер негізінде жүргізіледі. Жолдама алу үшін тұрғылықты жері бойынша мансап орталығына жүгіну қажет, – дейді министрлік өкілі.
Жастар практикасының ендігі жоспары – 12 мыңдай жастың жұмысқа орналасуына жәрдемдесу.
