Мемлекет басшысы Қ.Тоқаев Түркістан төрінде өткен Ұлттық құрылтайда: «Еліміз үшін стратегиялық маңызы бар тағы бір мәселе – шекаралас аймақтарды дамыту», деген еді. Осы орайда Абай облысындағы Мақаншы ауданының жөні бөлек. Өңірдің экономикалық өсуі, халықтың тұрақтануы аса маңызды. Биылғы 9 айдың қорытындысы бойынша Мақаншы ауданының негізгі капиталына салынған инвестиция көлемі өткен жылдың сәйкес кезеңімен салыстырғанда 147,3%-ға артқан. Бұл өсім ауданның тұрақты дамуын, инвестициялық тартымдылығының артып келе жатқанын айғақтайды. Бұл жөнінде Мақаншы ауданының әкімі Дәурен Қойгелдин баяндады.
– Ауданда бірқатар ірі инвестициялық жобалар жүзеге асырылып жатыр. Бақты ауылында көлік-логистикалық хабтың құрылысы басталды. «Di-Nur Company» ЖШС жалпы құны 7 млрд теңге болатын май өндіру, құрама жем зауытының құрылысын жүргізіп жатыр. Сондай-ақ «Qazaq Oil», «Royal Petrol», «Лукойл» компаниялары жанар-жағармай құю стансаларын салды. Бұған қоса Мемлекет басшысының Жолдауында айтылған «Бақты – Аягөз» теміржолы мен «Бақты» өткізу бекетін жаңғырту жобалары ауданның көлік-логистикалық әлеуетін арттырып, экономикалық серпін берері сөзсіз, – дейді аудан әкімі.
Аудандағы құрылыс саласында да оң нәтиже байқалады. Пайдалануға берілген тұрғын үй көлемі 7 379 шаршы метрге жеткен. Сонымен қатар әлеуметтік осал топтағы азаматтарды тұрғын үймен қамтамасыз ету мақсатында 59 жеке үйдің (118 пәтер) құрылысы жүргізіліп жатыр.
– Жол және инфрақұрылым саласында да ауқымды жұмыс атқарылады. 1 млрд 755 млн теңге қаржыға 41 шақырым жол жөндеу жұмысы жүргізіледі. Атап айтқанда, Мақаншы, Көктерек, Қызылбұлақ, Келдімұрат, Қаратұма, Бақты ауылдарының көшелерінде орташа жөндеу жұмысы қолға алынған. Мақаншы ауылындағы Жеңіс саябағы мен Қабанбай батыр ескерткіші маңында демалыс аймақтары жаңғыртылып, көше жарықтандыру жүйелері орнатылды. Бұл іс-шаралар ауданның келбетін жақсартып, тұрғындардың өмір сүру сапасын арттыруға бағытталған, – дейді аудан әкімі.
Әкімнің мәліметінше, халықтың көп демалатын орындарының бірі – Алакөлде жылдан-жылға демалушылар саны артып келеді. Бірнеше жылдан қордаланып қалған проблемаларды шешу, туристерге сапалы қызмет көрсету мақсатында облыстық бюджеттен жөндеу жұмыстарына 87,1 млн, жағалауды абаттандыру жұмыстарына 86,0 млн, жағалауға 7 пирс, 7 құтқару мұнарасын, 5 шақырым жағалауға түрлі-түсті қалқыма орнатуға 37,2 млн, жаңадан қоғамдық кеңістік орнатуға 165,8 млн теңге қаржы бөлініп, жұмыстары жасалған.
Аудан әкімінен Алакөлдегі кәріз жүйесін, Барлық арасанының жанындағы демалыс сауықтыру орынының жайын, Бақты ауылындағы апатты жағдайда деп танылған мектептің ахуалын сұрап білдік. Әкім өз сөзінде Алакөлдегі кәріз жүйесін орнату мәселесі қолға алынғанын, сол секілді Барлық арасанында қайта қалпына келтіруге байланысты жұмыс жүріп жатқанын айтты. Бақты ауылындағы мектеп жөндеуден өткен, қазір алаңдауға негіз жоқ.
Абай облысы
