Салтанатты іс-шараға Эстония Президенті Алар Карис пен оның жұбайы Сирье Карис, Мәдениет және ақпарат министрі Аида Балаева, эстон делегациясы, дипломатиялық корпус пен екі елдің зиялы қауым өкілдері қатысты. С. Карис құттықтау сөзінде ұйымдастырушыларға алғыс білдірді.
«Солтүстік халықтары үшін қолғап – тұрмыстық өмірде ең қажет дүние. Бұл нәрсені Қазақстанға қатысты айтуға да болады деп ойлаймын. Эстон Ұлттық музейінің көшпелі көрмесінде эстон халқының тарихы мен мәдениеті көрсетіледі. Біздің өрнектеріміз, символдар, халқымыз, ана немесе әже бейнесі ұсынылған. Иә, мәдениетіміздің маңызды бөлігі әйелдер арқылы берілді. Олар – отбасы мен ошағын, халық даналығын, салт-дәстүрді, әдет-ғұрыпты және мәдениетті сақтаған жандар. Мәдениетіміз, рухымыз әрдайым осы әйелдердің аялы алақанында болды. Біз оны жоғары бағалаймыз әрі құрметтейміз. Осы көрмені мейлінше көп адам тамашаласа деген тілек бар. Себебі бір-біріміздің мәдениетіміз бен өмірге деген көзқарасымызға қызығушылық таныту арқылы біз даналыққа және адамгершілікке бір табан жақындаймыз», деді Эстония Республикасының Президенті.
Іс-шара барысында Аида Балаева бірлескен көрме мәдени ынтымақтастықты нығайтуға, қолөнер, музей ісі саласында жаңа бірлескен жобаларға жол ашатынына сенім білдірді.
«Қазақстан үшін Эстонияның мәдени мұрасымен танысу ерекше маңызды. Осындай көрмелер ұлттық бірегейліктің жаңа қырларын ашып, шығармашылық диалогқа мүмкіндік береді. «Қолмен өрілген қолғап сыры» атты көрменің атауы терең мағынаға толы. Ол тек қолөнер мен шеберлікті емес, екі ел халқына тән жылы да сенімді қарым-қатынасты білдіреді. Қол мен қолғаптың бірін-бірі толықтырғаны сияқты, біздің мәдениеттер де өз болмысын сақтай отырып, дәстүрді қорғау мен оны заманауи тұрғыдан дамыту жолындағы ортақ ұмтылыста үйлесім табады», деді министр.
Экспозицияда Орта ғасырлардағы үлгілерден бастап, бүгінгі заманауи бұйымдар көшірмелері қойылған. Ондағы әрбір өрнек пен қолданылған түс өз дәуірі мен аймақтық ерекшеліктерінен сыр шертеді. Көрме 2025 жылғы 28 желтоқсанға дейін жалғасады.
