Солтүстік Қазақстан және Түмен облыстары келісімдер жасасты

ПЕТРОПАВЛ. 20 ақпан. Солтүстік Қазақстан облысының делегациясы Түмен облысында болып, бірқатар меморандумдарға қол қойды. Бұл туралы облыстық әкімдіктің баспасөз қызметі хабарлады. Қызылжар өңірінің басшысы Ерік Сұлтанов пен Түмен облысының губернаторы Владимир Якушевтың кездесуіне екі тараптан бизнес саласының өкілдері, ірі кәсіпорын басшылары қатысты. В.Якушев облыстар арасындағы сыртқы сауда айналымы 132,5 миллион АҚШ долларын құрайтынын, соңғы кездері кәсіпкерлік ынтымақтастықтың күрт артқанын жеткізді. Е. Сұлтанов өз сөзінде Қазақстанда жаңа жұмыс орындарын құру, инвестициялар тарту бағытындағы тәжірибелермен бөлісті. Ел экономикасына қаржы тартудың тиімді тұстарын атап, бірігіп жұмыс істеуге шақырды. Делегация бұдан кейін әлемнің 26 елінен келген ІІ халықаралық инвестициялық форумға қатысты. Онда Қазақстанның қазіргі қарқынды дамуы жайлы жылы пікірлер айтылды. Мәселен, «Опора России» қоғамдық ұйымның президенті Александр Калинин елімізде қалыптасқан экономикалық тұрақтылықты жоғары бағалады. Ірі кәсіпорындарды аралау барысында алдымен Антипинск мұнай өңдеу зауытына соқты. Мұнда өндірілетін «қара алтынның» сапасы Еуро-5 стандартына сәйкес келеді. Биылдың өзінде ғана 143 миллиард рубль инвестиция құйылыпты. Күніне 38 тонна нан-тоқаш пісіретін нан комбинаты қуаттылықты үш есеге арттыруды межелеп отыр. Медицина қалашығы құрамына енетін клиникалық аурухана мен нейрохирургия орталығында жылына екі мыңнан астам ота жасалатын көрінеді. Екі күнге созылған сапар соңында 10 меморандумға қол қойылды. Қос тарап ұлтаралық қарым-қатынас саласын нығайтуға да уағдаласты. Өмір Есқали. Дерек: Солтүстік Қазақстан облысы әкімдігінің баспасөз қызметі. Сурет: ura.ru.