Балалар мен жасөспірімдерді кітап оқуға баулу, насихаттау, оқырман талғамын қалыптастыру мақсатында ұйымдастырылған жәрмеңкеге Түркия, Өзбекстан, Моңғолия, Әзербайжан, Қырғызстан, Саха Республикасы (Якутия), Ресей елдерінен кітап саудасы, ғылыми-білім беру және полиграфиялық өнімдерін ұсынған 50-ге жуық баспа ұйымы қатысты. Кітап көрме-жәрмеңкесінің ашылу салтанатына Түркістан облысы әкімінің орынбасары Ертай Алтаев, ТҮРКСОЙ ұйымының бас хатшысы Сұлтан Раев, Әзербайжан баспалар бірлестігі директорлар кеңесінің төрағасы Шәміл Садық, ақын, Түркі дүниесі Жазушылар одағының төрағасы Ұлықбек Есдәулет қатысты.
Ел Президенті Қасым-Жомарт Тоқаев Ұлттық құрылтайдың үшінші отырысында: «Шын мәнінде озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек», деп осы бағыттағы жұмыстарды ілгерілетуді тапсырған болатын. Осы бағытта өңірдегі 388 кітапхана биылдың өзінде 380 мыңға жуық оқырманға қызмет көрсетті. Жыл басынан бері 31 мыңнан астам жаңа кітап алынып, жалпы кітап қоры 6 миллионнан асқанын растайды деректер.
«Turkestan Book Fair» кітап көрме-жәрмеңкесі үш күндік мәдени-іскерлік бағдарламаны қамтыды. Көрме аясында жаңа кітаптардың тұсаукесері, автормен кездесу, автограф-сессиялар, балалар алаңында арнайы шеберлік сағаттары өткізілді. Атап айтар болсақ, Мемлекеттік сыйлықтың лауреаты Несіпбек Айтұлы аударған «Ләйлі-Мәжнүн» дастанының, қырғыз жазушысы Сұлтан Раевтың «Жанжаза» романының, ақын, жазушы Ұларбек Дәлейұлының «Бату хан» атты тарихи-деректі жаңа романының, «Саха поэзиясының антологиясы» кітабының, М.Әуезов күнделіктерінің, «Тәрбие танымдары» кітабының тұсаукесері және жазушы Аягүл Мантайды еске алу кеші өтті. Сондай-ақ жәрмеңкеде белгілі қаламгер Баянғали Әлімжанов, ақын, жазушы Ұларбек Дәлейұлы, басқа да авторлармен кездесу кешіне қатысып, қолтаңбасын алуға, кез келген кітапты баспа бағасымен сатып алуға мүмкіндік жасалды. Кездесу барысында Баянғали Әлімжанов балаларға арналған 100-ден астам кітапты мектептер мен кітапханаларға тарту етті.
Облыс әкімдігінің қолдауымен «Фолиант» баспасы және ТҮРКСОЙ халықаралық ұйымы ұйымдастырған көрмеге, сондай-ақ «КітапХан» жобасының негізін қалаушы Хамит Ердехан қатысып, подкаст форматында Шыңғыс Айтматовтың «Қош бол, Гүлсары» хикаяты талқыланды.
ТҮРКІСТАН
