Ғалымның есімін есте қалдыру мақсатында Түлкібас ауданының әкімдігі мен жанашыр ағайын тарапынан бірқатар ауқымды шараларды жүзеге асыру да қолға алынып жатыр. Сондай игі шаралардың қатарында Қазақ руханиятының абызы Мекемтас Мырзахметұлына арнап, өзінің туған жері Түлкібас ауданы, Түркібасы ауылында салынып жатқан «Шілтөбе – Мекемтас биігі» тағзым кешенінің техникалық ашылу рәсіміне қатыстық. Біз, Дархан Мыңбай бастаған бірқатар азамат ең алдымен Мекемтастай ғұлама ағамыздың рухына мінәжат етіп, тағзым кешенінің құрылыс жұмыстарымен таныстық. Кешенге жазылған сөздерде қате кетпеуін қадағалап, өз пікірімізді ортаға салдық. Содан кейін ауыл мешітінде берілген асқа қатысқан қонақтар қазақ әдебиетінің аса көрнекті өкілі, ұлт руханияты үшін ерен еңбек сіңірген ғалымның мол мұрасын насихаттап, оны ел-жұртқа кеңінен танытатын Музейді ашу, жыл сайын 16 желтоқсанда ғылыми конференциялар ұйымдастыру, тағы басқа да мәселелерді көтерді. Жиналған қауым осы айтылған ұсыныстардың барлығын да бір ауыздан қолдады.
Айтпақшы, ауданның белсенді азаматтары тағзым кешеніне қатысты айтқан бір-екі ескертулерімізді орынды деп қолдап, бір аптада түзетіп қойғанына риза болдық.
«Жұмыла көтерген жүк жеңіл» дегендей, Мекемтас ағаның шәкірттері мен ағайындардың күшімен «Шілтөбе – Мекемтас биігі» тағзым кешені бой көтеріп, оған баратын жолды да тегістеп, асфальттап қойыпты. Бір сөзбен айтқанда, алдағы уақытта мұнда келген адамдар ғұлама ағамызға мінәжат етіп, М.Мырзахметұлының рухына Құран бағыштап, тағзым кешенін көріп тамашалауына толық мүмкіндік жасалған.
Мекемтас Мырзахметұлы бүкіл саналы ғұмырын Абайтану, Ясауитану, Бауыржантану, Мұхтартану мұраларын зерделеуге, оларды халыққа танытуға, отандық ономастика, әдебиеттану ғылымдарының керегесін кеңейтуге арнаған ғұлама болғаны бәрімізге белгілі. Мәкең ұзақ жылдар бойы ұлт руханиятының ілгері басуына сүбелі үлес қосып, көптеген шәкірт тәрбиеледі. Ұзақ жылғы қажырлы ізденістерінен туған құнды еңбектері билік пен оқырман тарапынан жоғары бағаға ие болды. Елге, әдебиет пен ғылымға сіңірген сүбелі еңбектерін ескере отырып, болашақта желтоқсан айындағы бір күнді «Мекемтас күні» деп белгілеу мәселесін қарастыру жағын Үкіметке ұсынамыз. Бұл ұсынысты зиялы қауым өкілдері де қолдайды деген сеніміз мол.
Қабыл ДҮЙСЕНБИ,
журналист, қоғам қайраткері
