Коллажды жасаған – Зәуреш СМАҒҰЛ, «EQ»
Жастардың құқықтық мәдениетін арттырып, сыбайлас жемқорлыққа қарсы көзқарасын қалыптастыруды мақсат тұтқан жиынға мектеп оқушылары, колледж және жоғары оқу орындарының студенттері, сондай-ақ қоғамдық ұйым өкілдері қатысты. Форумның ашылуында Абай облысы Ішкі саясат басқармасының басшысы Жарқын Жұмаділов қатысушыларға сәттілік тілей отырып, аталған іс-шараның қоғамдағы маңызын айтты.
«Мемлекет басшысы Қасым-Жомарт Тоқаев Қазақстан халқына Жолдауында «Біз заң мен тәртіп, білім мен парасат үстемдік ететін қоғам құруымыз керек», деп атап өтті. Бұл міндеттің табысты орындалуы жас ұрпақтың бойына адалдық, жауапкершілік және азаматтық мәдениетті сіңіруге тікелей байланысты. Сыбайлас жемқорлық – кез келген мемлекеттің дамуын тежейтін қауіпті құбылыс. Оған ең тиімді қарсы шара – алдын алу, яғни сананы өзгерту және білім арқылы қоғамдық мәдениетті қалыптастыру. Бүгінгі форум – осы мақсатқа бағытталған маңызды бастаманың бірі», деді Ж.Жұмаділов.
Форум қатысушылары қоғамдағы адалдық, әділеттілік және жауапкершілік құндылықтарын қалыптастыру жөніндегі пікірлерімен бөлісті. Шәкәрім университетінің ректоры Думан Орынбеков, облыс білім басқармасының басшысы Бауыржан Ердембеков, жастар белсендісі Қуаныш Молдақашев, Р.Байсейітов атындағы Семей қаржы-экономикалық колледжінің студенті Назерке Кадекова жас буынға арналған жаңа профилактикалық бағдарламаларды таныстырып, өз көзқарасын білдірді. Ректор Думан Орынбеков білім орнындағы адалдық қағидатын нығайту жөнінде атқарылып жатқан жұмыстарын таныстырды.
«Университет тарапынан адалдық қағидатын қалыптастыру мақсатында студенттеріміз өздерінің тың идеялары мен жобаларын ұсынып келеді. Бұл бастамалар жастардың жауапкершілігін арттырып қана қоймай, академиялық адалдық мәдениетін нығайтуға зор үлесін қосып жатыр. Соның нәтижесінде біз оқу орнында жаңа бағыттарға бет бұрып, ашықтық пен әділдікке негізделген ортаны қалыптастыруға мүмкіндік алып отырмыз», деді ректор.
Тағы бір маңызды бағыт – өңірде жүзеге асырылып жатқан «Адал азамат» біртұтас тәрбие бағдарламасы. Бұл бағдарлама мектепке дейінгі кезеңнен бастап құқықтық сауат, азаматтық жауапкершілік және әділдік қағидаттарын қалыптастыруды көздейді. Қазіргі таңда өңірдегі 286 мектепте 7 375 оқушыны қамтитын «Адал ұрпақ» клубтары, сондай-ақ 30 студенттік клубта 490 студент жұмыс істейді.
«Біздің басты міндетіміз – жас ұрпаққа жауапты азаматтық қасиеттерді сіңіріп, оларды адал және құқыққа құрметпен қарайтын азаматтар ретінде тәрбиелеу. «Адал азамат» бағдарламасы мектептен бастап құқықтық сауат, әділдік пен адалдық қағидаттарын қалыптастыруға бағытталған. Құқықтық мәдениет жүйелі түрде енгізілген жағдайда оқушылардың құқықтық сауаты артып, мектептегі тәртіп деңгейі нығаяды, сыбайлас жемқорлыққа төзбеушілік мәдениеті қалыптасады, әділдік, адалдық және жауапкершілік құндылықтары оқушылардың мінез-құлқының негізіне айналады», деді Б.Ердембеков.
Абай облысы
