Сора өсіріп сорлады

Оңай олжа арқылы тез байып кетуді армандайтындар аз емес. «Жеңілдің астымен, ауырдың үстімен» жүріп, маңдай тер, табан ақысыз қалтасын қампайтқысы келетіндер қашанда болған. Дегенмен, оның барлығы заң бұзушылыққа әкеп соғады. Нәтижесі белгілі. Темір тордың арғы бетінен бір-ақ шығады. Бүгінде республика аумағында «Көкнар» жедел-профилактикалық шарасы жүріп жатыр. Бұл іске қызылордалық полицейлер де тыңғылықты кірісіп кеткен. Осы шара барысында Арал ауданы, Жіңішкеқұм ауылынан шығысқа қарай 45 шақырым жерде есірткі затына ұқсас өсімдік өсіп тұрған 5 алқап анықталған. Тексеру жұмыстары кезінде заңмен тыйым салынған 3704 түп сора өсімдігін күтіп-баптап жатқан жерінен 57 жастағы, 45 жастағы және 32 жастағы үш азамат ұсталды. Алқаптағы өсімдіктің жалпы салмағы 3 тонна 333 килоны құраған. Сонымен қатар, сезіктілердің жа­тын орындарына тінту жүргізу кезінде жалпы салмағы 28 кило 77 түп кеп­тірілген сора өсімдігі табылды. Анық­талған айғақ заттар психотроптық заттар мен прекурсорларды зерттеу сот-сараптамасына жіберілді. Қазіргі таңда аталған үш азаматтың үстінен Қазақстан Республикасы Қылмыстық кодексінің 300-бабы, 1-бөлігі бойынша қылмыстық іс қозғалып, сотқа дейінгі тергеп-тексеру амалдары жүргізілуде. Үш азамат та уақытша ұстау абақтысына қамаққа алынды. Ержан БАЙТІЛЕС, «Егемен Қазақстан». Қызылорда облысы.