Елімізде осы спорт түрінің қарыштап дамуына өлшеусіз үлес қосқан атақты бапкер Мәдіғали Қарсыбеков пен Жасұлан Мұхамбетқалиев Орал қаласындағы шорт-трек үйірмесінің табалдырығынан аттаған бозбаланың бойындағы ерекше қабілетті бірден байқады. Қандай сынаққа салса да, жас дарын табандылық пен жанкештіліктің шынайы үлгісін көрсете білді. Жаттығу барысындағы еңбекқорлығы ерен болды.
Айбарлы Абзалдың қоржынында Олимпия ойындары мен әлем чемпионатының медалі ғана жоқ. Өзге жарыстарда сан мәрте жеңіс тұғырына көтерілді. Атап айтсақ, қоржынында Азия ойындарының толық жүлде жиынтығы бар. Сондай-ақ Әлем кубогінің жеңімпазы, Дүниежүзілік универсиаданың бірнеше дүркін жүлдегері, еліміздің 12 дүркін чемпионы деген мәртебелі атақтарға қол жеткізген саңлақ. Үш бірдей Олимпиадаға қатысып, соның екеуінің ашылу салтанатында қазақтың көк байрағын ұстап шықты. 2014 жылы Сочиде бесінші орын алса, 2018 жылы Пхёнчханда алтыншы сатыға жайғасты. 2022 жылы Бейжіңде жеңіс тұғырына сынық сүйем ғана жетпей, төртінші орынға тұрақтады.
Абзалдың бойында нағыз чемпионға тән қасиеттің барлығы бар. Ол – еңбекқор, жаттығу залында шелектеп тер төгуден еш тартынбайды. Жеңіске жету жолында еш аянып қалмайды. Техникасы жетік, шеберлігі шыңдалған, дұрыс тактика құрып, қажет кезінде шұғыл шешім қабылдай алады. Міне, осы қасиеттер А.Әжғалиевті биыл Олимпия ойындарының шыңына жетелеуге тиіс.
