Тергеу барысында күдіктінің көлік жүргізу құқығы болмағаны және тиісті оқу курсынан өтпегені анықталған. Сонымен қатар автокөлік иесіне, яғни күдіктінің жұбайына қатысты да қылмыстық іс қозғалды. Ол көлікті жүргізу құқығы жоқ адамға рөлге отыруға мүмкіндік бергені үшін жауапқа тартылып отыр. Мұндай құқықбұзушылық үшін заңда бас бостандығынан айыру жазасы да қарастырылған.
Қазір жол апатының барлық мән-жайын анықтауға бағытталған қажетті тергеу амалдары жүргізіліп жатыр.
11 мамыр күні Көкшетау қаласының мамандандырылған тергеу соты күдіктіге қатысты «үйқамақ» түріндегі бұлтартпау шарасын қабылдады.
Ақмола облыстық полиция департаментінің мәліметінше, аталған қылмыстық істің тергелу барысы ведомство басшылығының ерекше бақылауына алынған.
Еске салайық, Көкшетауда жол талғамайтын көлік әйелді басып кетіп, ол оқиға орнында жан тапсырған.
