Фото Polisia.kz
Тергеу мәліметінше, жасөспірімдер Астана қаласы мен өздері тұратын өңірде осындай 14 жалған хабарлама таратқан болуы мүмкін.
Сонымен қатар Шығыс Қазақстан облысында тағы бір тоғызыншы сынып оқушысы анықталды. Ол әлеуметтік желідегі жанжалдан кейін басқа адамдардың атынан Шымкент әкімдігіне және Ақтаудағы сауда үйінің әкімшілігіне жарылғыш зат қойылғаны туралы электронды хаттар жіберген.
Құқық қорғау органдарының айтуынша, оқушылар қылмыс жасау кезінде анонимді телефон нөмірлері мен электронды пошталарды пайдаланған.
ІІМ киберқылмысқа қарсы іс-қимыл департаменті басшысының орынбасары Аман Әубәкіров мұндай әрекеттер «әзіл» немесе «ойын» болса да, қылмыстық жауапкершілікке әкелетінін ескертті. Оның сөзінше, мұндай істер мұқият тексеріліп, кінәлілер міндетті түрде анықталады.
Алматы қаласында осыған дейін де лаңкестік акті туралы жалған хабарлама таратқан азаматқа қатысты сот үкімі шыққан еді.
