Қайырымдылықтың қайыры

Жақсылық Алладан қайтады дейді. Ал жақсылық жасасаң көңіліңе нұр болып құйылатыны анық. Жақсылық жасау – біздің ата-бабамыздан жалғасқан ұлы қасиет. Мұның мәні бүгін де өзгерген жоқ. Өзгелерге үнемі жақсылық жасап тұратын адамдар бар. Солардың адамгершілігі мен ізгілігі арқасында өмір үміті үзілмейді. Армандар орындалып, биік асулар алынуда. Мұның нақты көрінісін Астана қалалық балар үйінің тәрбиеленушілері бастан кешіп отыр. Мәселен, жыл басынан бері Астана қалалық ІІД аталған балалар үйін қамқорлыққа алған болатын. Содан бері тәрбиеленушілер полицейлер ұйымдастырған барлық іс-шараларға қуана да, қызыға да қатысады. Күнбе-күн оларды елеңдеп күтеді. Себебі, елордалық полицей­лер балалар үйіне бар жақсылықты әкелуде. Мәдени шаралар ұйым­дастырылуда. Өткенде балалар ІІД бөліністерінің кинологиялық қызмет орталығында экскурсияда болып, одан кейін полицейлер қолдауымен мұз айдынында коньки тепті. Қуаныштарында шек болмады. Олардың көпшілігі полицейлердің қалай жұмыс істейтінін, қызмет атқару барысында қандай қиындықтар және қауіп-қатерлерге тап болатыны туралы хабарсыз екен. Енді балалар полицейлердің нақты қандай жұмыстар атқаратынын білді. Департамент бөліністерін аралап, танысқан олардың көпшілігі, оның ішінде қыздар да құқық қорғау органдарының жұмысына қызығушылық танытты. Осылайша, үздіксіз жүргізілген қайырымдылық шаралары Нау­рыз тойындағы мерекелік сән-салтанатқа ұласты. Елордалық Ішкі істер департаментінің мә­жіліс залында балалар өз қам­қоршылары­мен бірге концерт қойды. Көрермендерге би топтары, вокал дуэттері өнер көрсетіп, 4-сынып оқушысы Зарина Омарқасова және 3-сынып оқушысы Кирилл Вишневский домбыра­мен тө­гілте күмбірлетіп күй орын­да­ды. Мерекелік қойылым қатысушыларының бірі, балалар үйінің түлегі Милана Серікова көптеген ән байқауларына қатысқан екен. Енді, міне, Астана қаласы ІІД-нің қаржылық қолдауы арқасында Милана көп ұзамай Чех Республикасында өтетін халықаралық байқауға да қатысатын болды. Оның қуаны­шында шек жоқ. Елордалық полиция басшысы Амантай Әубәкіров алдағы уақытта балаларға арнал­ған көптеген бірлескен іс-шара­лар өтетіндігін және оларға ар­нап елордалық полицейлер ұйым­­дастыратын экскурсиялар мен түрлі қызықты шаралар бар екендігін айтты. Бұдан кейін ІІД қызметкерлері балаларды департамент территориясында орналасқан мұражай мұрағаттарымен таныстырды. Мұражай залында қаланың ішкі істер органдарының тарихы жайлы сыр шертетін экспонаттар, тарихи құжаттар, қару-жарақтар, өткен жылдардағы полиция қызмет­керлерінің формалары, спорт түрлері бойынша республикалық және халықаралық жарыстарда жеңіп алған спорттық наградалар қойылған. Бұларды көріп, балалар таң-тамаша қалды. Сосын олар өздеріне арнап жайылған мерекелік ақ дастарқан басына отырды. Сол жерде оларға арнайы дайындалған көптеген сыйлықтар табысталды. Бұл сәтте, не керек, Астана қалалық балалар үйі тәрбиеленушілері шаттықтан жүздері бал-бұл жайнап, қуаныштарын жасыра алмады. Иә, балалардың қуанғанына не жетсін! Жалпы, 2015 жыл елордалық полицейлер үшін «Халық сенімі – полиция қуаты» ұранымен өтуде екендігін еске саламыз. Астана қалалық ІІД бастығы, полиция генерал-майоры Амантай Әубәкіровтің айтуынша, полиция қызметкерлері жыл бойы қайырымдылық шараларын, жаппай-мәдени және спорттық іс-шараларды өткізе бермек. Өйткені, шынайы қайырымдылықтың ел үшін игі қайырымы болатынын ұмытпаған жөн. Александр ТАСБОЛАТОВ, «Егемен Қазақстан».