Өшпес даңқ іздері

«Біз – Жеңістің мұрагеріміз!» әскери-патриоттық эстафета Қызылжар өңірінде бірнеше күнге жалғасып, аға ұрпақтың өшпес ерлігін паш етті. Акция Достастық елдері Пре­зи­денттерінің жеңістің 70 жыл­дығын мерекелеу туралы бір­лескен іс-шаралар шеңберінде атқа­рылып, жас­тар арасында пат­ри­оттық тәрбиені нығайтуға бағыт­талған. – Адамның атамекенге, туған жерге деген перзенттік махаббатын, сүйіспеншілік сезімін қалыптастыруды көздейтін мұндай шаралардың маңызы зор. Сол себепті Ұлттық ұланның гарнизондары мен әскери бөлімдерінде кеңінен атап өтіледі,–дейді ұйым­дастырушылар. 1941 жылы 15 желтоқсанда Ақмола /қа­зір Астана/ қаласында құрылған 72-ші гвардиялық атқыш­­тар дивизиясының Жауын­герлік туы эстафетаның бас­ты атрибуты ретінде алынуының өзіндік мәні бар. Әскери құрама жорық жолдарын Мәскеуден Берлинге дейін жалғастырып, жауға қарсы жойқын соққылар жасағаны үшін гвардиялық» атақ берілген. Қазақстан Республикасы Ұлт­тық­­­ гвар­­­дия­­­сының әскери бө­лім­дерінде кең­ кө­­лем­де аталып жатқан «Біз – Жеңістің мұра­ге­ріміз!» эстафетасының ке­зекті шеруі облыс орталығындағы Жеңіс саябағында жалғасты. 72-ші гвардиялық дивизиясы Жауынгерлік туының көшірмесін табыс етуге арналған салтанат­ты жиынға облыс әкімінің орын­- басары Владимир Бубенко, Ұлы Отан соғысы мен еңбек арда­гер­лері, Петропавл әскери инсти­тутының курсанттары, 6637 әскери бөлімінің жауынгерлері, ішкі істер департаменті мен жастар өкілдері қатысты. Ұлттық ұланның Петропавл әскери институтының басшысы, полковник Жұмабек Ахметов салтанатты рәсімде сөйлеген сөзінде фашизмді жеңуге Қазақстанның теңдессіз үлес қосқанын, Ұлы Отан соғысы жылдары елімізде 25 әскери құрама, 50 жеке полк пен батальон құрылғанын, со­лардың бірі қазіргі елордада жа­сақталған 459-шы атқыштар ди­визиясы (кейін 29-шы) болып та­былатынын, жауынгерлердің, сер­жанттар мен офицерлердің жап­пай көрсеткен ерлігіне орай 72-ші гвардиялық атқыштар дивизиясы мәртебесін иеленгенін атап көрсетті. Әскери құрама 721 елді ме­­кен­ді, 13 ірі қаланы азат етуге қатысқан. Даңқты дивизияның 18 мыңнан астам жауынгері мен офицері ордендермен, медальдармен марапатталған. 31 қаһарман Кеңес Одағының Батыры атанған. Астаналық интернационалист жауынгерлер запастағы генерал-майор Марат Мәрденовтің басшылығымен дивизияның жүріп өткен жауынгерлік жолдарына экспедиция ұйымдастырған. Сондай сәттердің бірінде Волго­град қаласының әкімшілігі диви­зия­ның Жауынгерлік туының көшір­месін қазақстандықтарға тар­ту еткен. Қазақстан Президенті – Қарулы Күштердің Жоғарғы Бас қолбасшысы Н.Назарбаев салтанатты жағдайда табыс еткен бұл жәдігер Ұлттық гвардияның 5573 әскери бөлімінде мәңгі сақталатын болады. Өмір ЕСҚАЛИ, «Егемен Қазақстан». Солтүстік Қазақстан облысы.