Уақытында аяқталды

Биыл ақмолалықтар үшін орақ науқаны тамыздың 19 жұл­ды­зында, агроөнеркәсіп кешенінің дәстүрлі кеңесінен басталды десек қателеспеспіз. Мұнда маңдай термен өсірілген мол ырыздықты ысырапсыз жинап алудың озық тәсілдері қарастырылып, алдыңғы қа­тар­лы ауылшаруашылық құ­рылымдары өз тәжірибелерін ор­таға салды, күзгі ауа райы­ның ерекшеліктері де айтылды. Облыс бойынша ауыл­ша­руа­шылық дақылдарының жалпы көлемі 4547,9 мың гектарды құраса, оның 4147,5 мыңы дәнді және бұршақ дақылдарына тиесілі. Сонымен қатар, 244,3 мың гектар майлы дақылдар, 132,8 мың гектар мал азығы, 18,7 мың гектар картоп және 4,4 мың гек­тар көкөніс өсіру қолға алынды. Әйткенмен, егістік алқаптарда фито­санитарлық жағдай өте күрделі болғанын айтуымыз керек. Мәселен, 4,5 миллион гектар егістік, яғни 108,3 пайызы химиялық өңдеуден өтті. Сондай-ақ, септериоз және астықтың сұр көбелегіне қарсы химиялық өңдеу жұмыстары жүргізілді. Биылғы науқанға 8561 астық комбайны жұмылдырылды, оның 1129-ы алымдылығы жоғары ше­телдік техника. Егін орағын ой­да­­ғыдай өткізуге қажет жүк кө­лік­тері және трактор тіркемелері 100 пайыз әзір болды. Жанар-жа­ғар­маймен қамтамасыз ету мәсе­лесі де оң шешілді деп айта аламыз. Егін орағы кезін­дегі ең бас­ты мәсе­лелердің бірі – ас­тық қабылдау кәсіп­орындарының дай­ын­дығы. Осы орайда, биылғы науқанға ли­цензиясы бар 60 астық сақтау кәсіп­орны қатысып отыр. Бұл кәсіпорындарда 3,9 миллион тонна астық сақтауға болады. Оған қоса ауылшаруашылық құ­рылымдарының өзінде 1,9 миллион тонна көлемінде астық сия­тын қоймалар бар. Осыдан-ақ биылғы алынған астықтың далада қалмайтынын байқауға болады. Ал, 210 астық кептіргіш тәулігіне 86 мың тонна астықты өңдей алады. «Жұмыла көтерген жүк жеңіл» дегендей, ел ырыздығы ысырапсыз жинап алынды. Егіс ал­қабының әр гектарынан 11,2 центнерден өнім алынып, 4632,7 мың тонна астық қамбаға жеткізілді. Өнімнің сапасы өткен жылғымен салыстырғанда бір саты жоғары. Мұның өзі жыл сайын шетелге астық шығару дәстүрін жалғастыруымызға мүмкіндік береді. Келесі жылдың егісіне қажетті 523,3 мың тонна тұқым құйып алдық. Осы орайда, гектар берекесін 15 центнерден айналдырған Зеренді, Сандықтау ауданы диқандарының табысын бөлектеп айтуға болады. Жақсы ауданы 535,8 мың тонна астық жинап отыр. Бұл өткен жылғыдан 45,9 мың тоннаға көп. Мұрат БАЛПАН, Ақмола облыстық ауыл шаруашылығы басқармасының басшысы. Ақмола облысы.