Wi-Fi Bus Astana

Енді Астана тұрғын­дары мен қонақ­­тары қоғамдық көлік­тер­де тегін интернетке қосыла алады. Осы мақсатта қолға алын­ған жоба аясын­­­­­­­­да 400 автобус ғалам­­тормен жабдық­талды.  Ұйымдас­ты­рушылар шілденің соңына дейін қаладағы барлық автобус паркін осындай желімен қам­туды жос­парлап отыр. Жобаны Астана қаласы әкімдігінің қолдауымен «Beeline Қазақстан» компаниясы жүзеге асырды. Сондай-ақ, «Астана Innovations» инновациялық даму операторы мен «Астана LRT» елорданың көлік инфра­құрылымын дамыту операторы тың бастаманың сенімді серіктестері болып табылады. Жалпы, бұл жұмыс Елба­сы­ның Астананы әлемдегі 50 ақылды қаланың қатарына қосу туралы тапсырмасына сәй­кес жасалып отыр. Соған орай елорданың көлік жүйесін кешен­ді түрде жаңғырту ісі қар­қын­ды жүргізілуде. Бұл ретте, ең алдымен, халық үшін қолайлы жағдай туғызу көзделген. «Beeline Қазақстан» ком­па­ниясының атқарушы директоры Тарас Пархоменконың айтуынша, әр автобуста бір мезетте 15-20 адам ғаламторға қосыла ала­ды. Бір сеансы 15 минуттан тұра­ды. Сондай-ақ, ол алғашқы сәт­тен-ақ халықтың жобаға ерекше қы­зығушылық танытқанын айтты. – Желінің жылдамдығы секундына 1,5-тен 10 мегабайтқа дейін жетеді. Жоба қосылғаннан кейін бiрнеше сағаттың iшiнде автобустардағы интернеттi 300-ден астам адам пайдаланады. Сол уақыттың ішінде олар 2,5 гигабайт трафикті пайдаланып үлгерген, – деді Т.Пархоменко. Айта кетейік, WI-FI Bus жобасы Қазақстанда 2013 жылы қолға алынды. Содан бері Ал­маты, Қарағанды, Қызылорда, Қостанай, Петропавл, Түркістан, Орал және Көкшетау қалаларында 200-ге жуық қоғамдық көлік те­гін интернетпен қамтылды. Ал Ас­тана бұл қатарға еліміздегі то­ғызыншы қала болып тіркелді. Еламан ҚОҢЫР, «Егемен Қазақстан».