Қарағандыда таксилер сары түске боялуы мүмкін

ҚАРАҒАНДЫ. 3 шілде. Қарағандыда «Қауіпсіз жол» деп аталатын жол қозғалысы қауіпсіздігінің қауымдастығы қаладағы таксилердің бәрін сары түске бояп тастау жөнінде бастама көтерді. Бұл туралы zakon.kz хабарлады. Бастамашы топтың айтуынша, мұндай қадамға олар кейінгі кезде қалада заңсыз адам таситын «таксилерге» деген қарақшылық шабуылдардың көбейіп кеткенімен түсіндіреді. Бұл – бір, екіншіден олар Қарағанды таксиінің түсі еуропалық стандарттарға сай болуы керек деп санайды. Негізі, бұл бастама осыдан екі жыл бұрын көтеріліп, аяқсыз қалған болатын. Олардың ұсынысы бойынша тасидің түсі сары болу керек те, әр аудан көлік сыртын өзінше безендіруге тиіс-тін. Жолаушылар тасымалымен айналысатын ұйымдар бұл бастаманы жақтырып отырған жоқ. Такси жүргізушілерінің де пікірі «Басты ауыртпасынға» саяды. «Далада жатқан ақша жоқ. Ақшасын төлесін, қазір-ақ боятып тастаймын», – дегендер де бар олардың арасында. Қайрат Әбілдинов. Дерек: zakon.kz. Сурет: kp40.ru.