Сенаторлар сайлаушылар арасында

Парламент Сенатының депутаты Жабал Ерғалиев Көкшетау қаласының әлеуметтік-экономикалық жағдайымен танысып, шағын кәсіпкерлік және денсаулық сақтау нысандарын аралады, еңбек ұжымдарында еңбеккерлермен кездесті, деп хабарлады Сенаттың бас­пасөз қызметі. Қала әкімі Ермек Маржықпаев облыс орталығындағы игілікті істер туралы сенаторды хабардар етті. Көкшетау қаласының экономикасы нығая түсуде, өнеркәсіп өндірісінің көлемі ұлғайып, тұрғын үй құрылысы артты, халықты жұмыспен қамтамасыз ету көрсеткіштері жоғарылады. Сенатор «Ақмола Бидай» ЖШС-де болды. Оның басшысы, Ауғанстаннан қоныс аударып келген Абдул Халил Наджибулла Елбасының отандастарына деген қамқорлығына орай алғысын білдірді. Ж.Ерғалиев сондай-ақ, «НовоПэк» кәсіпор­нындағы технологиялық кезеңдермен танысты және «Авиценна» емдеу орталығында болды. Депутат, сондай-ақ, «Нұр Отан» партия­сының Ақмола облыстық бөлімшесі ұйым­дастырған «Бақытты балалық» жобасы аясындағы «Мектепке жол» шарасына да қатысты. Облыстық және қалалық мәслихаттың депутат­тары өз қаржыларынан аз қамтылған отбасылардың балаларына арналған көмек берді. Халық қалаулылары 49 оқушыға 1 миллион теңге көлемінде сертификат берді. Сенатор Ж.Ерғалиевтің ақшалай сертификаты Көкшетау қаласындағы №21 орта мектептің оқушысына табыс етілді. Сенатор сапар аясында Ақмола облысының Зеренді аудандық мәслихатының кезекті 38-ші сессиясына қатысты. Сессияда сөз алған Ж.Ерғалиев Президент Н.Ә.Назарбаевтың Қазақстан халқына арнаған «Нұрлы Жол – болашаққа бастар жол» Жолдауының тарихи маңызына тоқталды. Қазіргі даму кезеңінде әлем жаңа қатердің – жаһандық қаржы дағдарысының алдында тұр, – деді сенатор өз сөзінде. Елбасы  экономиканың кез келген дағдарысына дайын болуға, одан қуатты мемлекеттер мен бірлігі мен ынтымағы мықты елдер ғана шыға алатындығын ұдайы ескертіп келеді. Бізде еліміздің қарқынды дамуына арналған нақты жоспарлар мен бағыттар бар. Солардың ішіндегі маңызды бағдарламаның бірі «бес институттық реформаны іске асыру жөніндегі 100 нақты қадам» болып отыр, деп атап өтті сенатор. * * * Парламент Сенатының депутаты, Әлеуметтік-мәдени даму және ғылым комитетінің мүшесі Серік Бектұрғанов Қостанай облыстық басқармасының бірқатар қызметкерлерімен кездесті, деп хабарлады Парламент Сенатының баспасөз қызметі. Сенатор еліміздің әлеуметтік саласының даму келешегі, Парламент қабылдаған заңдар және Мемлекет басшысының бес институттық реформасын іске асыру жөніндегі жоспарланған заң шығару жұмыстары туралы әңгімеледі. Кездесулер барысында аймақтың өзекті мәселелері, атап айтқанда, жергілікті атқарушы органдар мен салалық министрліктер ара­сындағы өзара іс-қимылы талқыға салынды. * * * Парламент Сенатының депутаты Жабал Ерғалиев Ақмола облысының Жақсы аудандық мәслихатының кезекті 38-ші сессиясына қатысты, деп хабарлады Сенаттың баспасөз қызметі. Жақсы ауданының әкімі Қанат Сүйіндіков «Бизнестің жол картасы-2020» бағдарламасына сәйкес ауданда 918,2 миллион теңгенің инвестициялық жобалары жүзеге асырылып жатқанын, бұл өткен жылмен салыстырғанда 3,2 пайызға артық екенін айтты. Шағын және орта кәсіпкерлік дами түскені анық байқалады. Ақмола облыстық білім беру саласы қызметкерлерінің тамыз мәслихатында қазақ, орыс және ағылшын тілдерін тереңдетіп оқыту, барлық колледждерде бірте-бірте дуалды оқытуға көшу мәселелері көтерілді. Сенатор Ш.Ерғалиев оқыту сапасын арттыру қажеттігіне мұғалімдер назарын аударды. Сондай-ақ, ол Кеңес Одағының Батыры, академик, қоғам қайраткері Мәлік Ғабдуллиннің 100 жылдығына арналып Зеренді ауданында өткен «Ақын халықтың батыр ұлы» атты облыстық мәдени көпшілік іс-шараға қатысты. – Ел ерсіз болмайды. Сол елдің ері Мәлік Ғабдуллин болса, батырдың соғыстағы да, бейбіт өмірдегі де өмірі бүгінгі және келер ұрпақтарға әрдайым өнеге болып қалары анық, – деді сенатор Ж.Ерғалиев өз сөзінде.