Маңызды іске үлес қосамыз

Мұғалім – мектептегі білім беру мазмұнын жаңарту жағдайында жаңғырту стратегиясын жүзеге асыратын басты тұлға. Қазақстанда соңғы бес жылда қолданысқа енген институттық реформалар арасында педагогтың мәртебесін арттыру және оның тұрақты кәсіби дамуын қолдау жүйесіне ерекше орын бөлініп отыр. 2012 жылы 1 республикалық және 14 облыстық, Астана мен Алматы қалаларының педагогикалық қызметкерлерінің біліктілігін арттыру институттарын біріктіретін «Өрлеу» біліктілікті арттыру ұлттық орталығы» акционерлік қоғамын құру нәтижесінде мұғалімнің кәсіби сапалы дамуының стратегиясы қалыптасты. 2015-2016 оқу жылының басында «Өрлеу» БАҰО» АҚ-тың 17 институты біліктілікті арттырудың қысқа мерзімді және деңгейлік курстарының бағдарламаларын жүзеге асырудың,  көптілді білім беруді ұйымдастыруға дайындықтың, PISA және TIMSS  халықаралық зерттеуіне қатысудың айтарлықтай тәжірибелерімен келді. Биылғы жылдың қыркүйек айынан бастап  біліктілік арттырудың жаңа бағдарламалары, оның ішінде: «Өзін-өзі тану» рухани-адамгершілік тәрбиенің үш айлық курсы, инклюзивті білім беруді ұйымдастырудың айлық курсы ұсынылады. PISA халықаралық зерттеуін өткізу аясында оқушылардың функционалды сауаттылығын дамыту бағдарламасы бойынша орталықтың профессор-оқытушылар құрамы қатарынан 90 тәлімгер дайындалып шықты. Мектептегі білім берудің жаңғыртылған мазмұны  аясында мұғалімдерді жұмысқа дайындауға «Назарбаев зияткерлік мектептері» ДББҰ 8 бағдарламасы бойынша 264 қызметкер оқытылды. Мұғалімді қолдауға вебинарлар, конференциялар, семинарлар, әдістемелік десанттар өткізілді, институттардың  мерзімдік ақпараттық, ғылыми және әдістемелік газет-журналдарында оқу үдерісін ұйымдастырудың өзекті мәселелері бойынша 700-ден аса ғылыми-әдістемелік әзірлеме шықты. Аймақтарда «Өрлеу» біліктілікті арттыру ұлттық орталығы ұйымдастырған «Педагогикалық оқулар», «Үздік әдіскер», «Үздік психолог» респуб­ликалық байқаулары қолдау тапты. Ал Қарағанды біліктілікті арттыру институты «шынайы кәсіби қолдау курс­тарда аяқталмайды» деген қағидатты ұстанады. Мәселен мұғалім институт педагогтарымен бірге курстан кейінгі жұмыстың картасын – үздіксіз кәсіби даму механизмін іске қосуға бағытталған ерекше тұлғалық өсу бағдарламасын жасайды. Біз ауылдық жерлердегі сертификатталған мұғалімдерді курс­­тан кейінгі қолдауға да ерекше кө­ңіл бөлеміз. Біліктілік арттырудың деңгейлік курстарында оқудан өтуге мүмкіндік алмаған мұғалімдер арасында «Назарбаев зияткерлік мектептері» ДББҰ тәжірибесін таратуға мүмкіндік туғызуды қолға алдық. Мұғалімді оқыту жауапты әрі қиын. Біліктілік арттыру институтының профессор-оқытушылар құрамы Қарағанды облысында бәсекеге қабілетті педагогтар дайындауға күш-жігерін аямайды. Сондықтан да, қазақстандық үлгілі мектептер құруға жағдай қалыптастырып, маңызды іске өз үлесімізді қосамыз. Сәулеш МҰҚАНОВА, «Өрлеу» БАҰО» АҚ филиалы Қарағанды облысы бойынша педагогикалық қызметкерлердің біліктілігін арттыру институтының директоры, педагогика ғылымдарының докторы.