Әріптеске ілтипат

Алымдылығымен, адуындылығымен екінің біріне дес бермейтін әйел-аналарымыздың қатарынан журналист Күмісжан Байжан да табылады. Қашанда, әліптің артын күтіп, байсалдылығымен бастаған жұмысынан оң нәтиже шығару қалыптасқан әдеті. Бір мысал ретінде айтар болсақ, ол жыр алыбы Жамбыл Жабаевтың туған күнін жыл сайын жоғары деңгейде атап өтуді қалыптастыруға өзіндік еңбек сіңіре білді. Алматы облысы, Жамбыл аудандық «Атамекен» газетін басқарып отырған жылдарында осынау игілікті іске ұйытқы һәм қозғаушы күш иесі болғандығын ешкім теріске шығара алмасы хақ. Республикалық бас басылым «Егемен Қазақстан» газетінің Алматы облысындағы меншікті тілшісі қызметіне келгенде құдды қосымша тынысы ашылғандай күні-түні тынбай еңбек етті. Ең бастысы, жауапкершілік жүгін жете сезініп, барынша шығармашылық ізденісте жүрді. Бойындағы бір қасиеті – өт­кенді екшеп, таразылай алатыны дер едік. Өмір қажеттілігімен жасалған қадамдарды әсте ұмытпай журналистер қауымына тән адал­дықпен ар тазалығын сақтауға талпынып қа­на қоймай, оң нәтиже шығара алатындығы де­сек артық айтқандық емес. Кепілдік берер бір ауыз сөзімен үлкен лауазымды тұлғаны да илан­дырғанын ет құлағымыз естіген. Тағы бір қы­ры көмекке өте зәру болған жандармен тез ұғы­нысып, демей білетіндігімен де көріне алды. Сол қам­қорлығының нәтижесін көрген жандар ара­мызда баршылық. Жүрген жерінде жақсы із қал­дыра білетіндігіне бір дәлел, оның кешегі мейі­рім шуағына толы күндерін көріп, жұмсақ жү­рек­ті жанның жылуын сезінген сіңлілері тамса­на айтып, үлкен ілтипат танытып жүргеніне куәміз. Жүрегінің түбіндегі сөз маржанын бір шумаққа сыйғыза білген Күмісжан Бай­жанның: «Ұнатамын періште үнін құстардың, Дәл солардай қалықтауға құштармын. Ұя салып балапанын өсірген, Қарлығаштай ой-сөзімді ұштармын» деген өлең жолдары осы ойымызды бекіте түседі. Елбасының Алғыс хатымен бірнеше мәрте марапатталып, «Егемен Қазақстан» газетінің Алматы облысындағы меншікті тілшісі қызметін жеті жыл атқарып, Мәдениет қайраткері, «Еңбек ардагері» және мерекелік медальдардың иегері болып, Алматы облысы мен Талдықорған қаласының, Жамбыл ауданының Құрметті азаматы атанған Күміс­жан Байжан журналистика саласында қырық жылдан астам жемісті еңбек етті. Бүгінде ұлын ұяға, қызын қияға қондырып, қосағымен қоса ағарып сол еңбегінің жемісін жеп отыр. Бұл да бір ақталған үміттің, ойға алғанның орындалғаны екені анық.  Нұрбол ӘЛДІБАЕВ, «Егемен Қазақстан». Алматы облысы, Жамбыл ауданы.