Абыройымыз арта берсін

Біздің еліміз Еуропадағы қауіп­сіздік және ынтымақтастық ұйымына төрағалықты үлкен абы­роймен атқарып шықты деп айта аламыз. Кешегі өткен, әлем­нің 56 мемлекеті басшыларымен басқа да лауазым иелері қатысқан Саммит, ондағы талқыланған қа­зір­гі кезеңде адамзат алдында тұр­ған ғаламдық мәселелер ту­ралы консенсусты шешім шыға­рылып, оның қорытындысы бой­ын­ша Астана Декларациясы қа­был­данды. Бұл, сөз жоқ, Қазақ­стан Республикасының, бүкіл Қазақстан халқының, Президентіміз – Ұлт Көшбасшысы Нұрсұл­тан Назарбаевтың әлемдік саяси аренадағы зор табысы. Біз, Қызылорда облысы этно­мәдени бірлестіктерінің өкілдері Саммит жұмысын үлкен ықы­лас­пен бақылап, қалт жібермей тың­дадық, қорытынды құжаттың қа­былдануын күттік. Құдайға шү­кір, барлық делегация басшылары бір адамдай алдын-ала межеленген мәселелер бойынша келісімдерін беріп, Астана Декла­рация­сы дүниеге келді. Оның қабыл­данғаны туралы түнгі сағат бірде Елбасы Н.Назарбаев БАҚ өкіл­дері арқылы дүние жүзіне жария­лаған сәтте қуанышымыз қойны­мызға сыймай, балаша қуандық. Саммитте межеленген үш өл­шем бойынша қабылданған мәсе­ле­лердің барлығы өте маңызды. Соның ішінде халықтар ара­сын­дағы келісімді, ынтымақты білдіретін, бейбіт қарым-қатынасқа ша­қырған шешімдерді жүрегі­міз­ге жақын болғандықтан, бөліп айтқымыз келеді. Ұзаққа созылып отырған қыр­ғи-қабақ шиеленіс ошақтарына қатысты мемлекет басшылары­ның бір орталықта, бір жерде кездесуі бұрын-соңды болған жоқ еді. Бұған Елбасының ерен ең­бегінің арқасында ұйымдас­ты­рыл­ған Астана Саммитінде қол жеткізілді. Саммит барысында осы шиеленістер өзінің оңтайлы шешімін табуға икемделе бастады деп ойлаймыз. Мемлекет басшы­лары бұл тек Қазақстанның беделі мен жеңістері емес, сонымен бірге, Орталық Азия аймағының беделі дегенді айтты. Бұл – шын сөз. Дамыған Еуропа мемлекеттерімен қатар, Орталық Азия мемлекеттері өз қауіпсіздігі мен ын­тымақтастығын тең дәрежеде білдіре алды. Демек, қауіпсіздік пен ынтымақ консенсусы Еуропа шең­берінен шығып, Азия континентіне қанат жая бастады деген сөз. Бұл халықтар ынтымақ­тас­тығына апаратын жол, айтар­лық­тай табыс. Саммитте көптеген ұлттар мен ұлыстарды бір адамның баласын­дай біріктіріп отырған қазақ­стан­дық ұлт саясатының моделі тура­лы сөз қозғалды. Осыған бай­ла­нысты біздер, Қазақстанда өмір сүріп жатқан ұлт өкілдері мұның тек сөз емес, нағыз өмір шын­дығы екенін мақтанышпен айта аламыз. Астана Саммиті еліміздің мерейін өсіріп, абыройын асқақ­тат­ты. Кеше ғана тәуелсіздік алған еліміз аймақтық мемлекет дең­гейі­нен әлемдік дәрежеге көтері­л­ді. Бұл – тарихи даму белесі. Ортақ Отанымыз – Қазақ­станның одан әрі өркендеуі үшін, жан-жақты дамуы үшін тарихи, саяси жол салынғанына қуаныш­тымыз. Қазақстан халқының бірлігі арқасында талай асулардан абыроймен өтеміз деп ойлаймыз. Лайым солай болсын. Қызылорда облысының этномәдени бірлестіктері өкілдері: Галина Шербакова, «Славяне» этномәдени бірлестігінің жетекшісі; Елена Ким, «Қазақстан корейлері ассоциациясы» облыстық филиалының жетекшісі; Филипп Алхазов, «Понтийцы» грек этномәдени бірлестігінің жетекшісі;  Гульчин Гейдарова, түрік этномәдени бірлестігінің жетекшісі; Галия Гизатуллина, татар этномәдени бірлестігінің жетекшісі;  Мовлади Исаев, «Вайнах» чешен этномәдени бірлестігінің жетекшісі; Людмила Ли, «Lev ami» еврей этномәдени бірлестігінің жетекшісі; Ашур Хамидов, өзбек этномәдени бірлестігінің жетекшісі; Ирина Шек, «Wiedergeburt» неміс этномәдени бірлестігінің жетекшісі.