Францияның белгілі режиссері қайтыс болды

АСТАНА. 30 қаңтар. Францияның белгілі режиссерлерінің бірі Жак Риветт 87 жасында қайтыс болды. Өмірінің соңғы жылдарында қауіпті альцгеймер аурымен ауырып келген. Бұл туралы lenta.ru сайтына сілтеме жасаған egemen.kz тілшісі хабарлады. Әйгілі режиссер 1950 жылдары қызметін киносыншы ретінде бастаған. Бірнеше басылымдардың ашылуына себепкер болды. Франциядағы ең ірі Les Cahiers du cinema журналының бірнеше жыл бас редакторы болған. 1960 жылы ең алғашқы «Париж бізге тиесілі» фильмін түсірді. Әлемге аты кеңінен таралған Жан Люк Годар, Франсуа Трюффо, Клод Шаброль сынды режиссерлермен бірлесіп «жаңа толқын» деп аталған кинематографиядағы жаңа ағымның негізін қалады. Франсуа Трюффоның айтуынша, «жаңа толқын» Жак Риветтің арқасында пайда болған. Аталған бағыт кино саласында көптеген жаңашылдықтарын алып келді. Фильм барысында сюжеттің күтпеген жерден өзгеріп кетуі, динамикасы, түсірілімнің жаңа қырлары көрерменге жол тартты. Жак Риветтің бастауымен түсірілген «Монах әйелі» (1966), «Ессіз махаббат» (1968), «Селин мен Жюли нағыз суайт» (1974), сондай-ақ, 13 сағаттан тұратын «Маған жолама» (1971) фильмдері кино тарихындағы ең ұзақ фильм болып есептеледі. Аян Әбдуәли. Дерек: lenta.ru. Сурет: rian.com.ua.