Apple компаниясы жаңа iPhone SE смартфонын шығарды

АСТАНА. 22 наурыз. Белгілі Apple компаниясы 4 дюймді жаңа iPhone SE смартфонын таныстырды. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. Жаңа құрылғының бір ерекшелігі сыртқы келбеті 5S формасына ұқсағанымен, функциялық жағынан 6S үлгісімен бірдей қызмет атқарады. Тіпті, көпшіліктің жиі қолданатын Live Photos та бар. Негізгі камерасы 12 мегапиксель болғандықтан 4К видео түсіре алады. Процессоры А9 болса, қосымша процессоры М9. Компания басшысы Тим Куктың айтуынша, халықтың шағын телефонға деген сұранысы жоғары болғандықтан, жаңа құрылғының түр-келбеті бұрынғы айфонға ұқсастырылып шығарылған. Сондай-ақ, ол жиын барысында iPhone 5S телефоны ендігі сатылымға шықпайтынын мәлімдеді. Гаджеттің 14 гигабайт сыйымдылығының құны 399 АҚШ доллар болса, 64 гигабайттысы 499 долларды құрайды. Девайсты 31 наурыздан сатып алуға болады. Ал елімізге қашан келері әзірге белгісіз. Алдын ала болжам бойынша осы айдың соңына таман немесе келесі айдың басында шығуы мүмкін. Аян Әбдуәли. Дерек: ТАСС. Сурет: vk.com.