Наурыз нысандары

Өскеменде Наурыз күні қар­саңында екі білім беру мекемесі есігін айқара ашты. Ұлыстың ұлы күнінде облыс орталығында №46 мектеп пен «Азамат» бала­бақшасының тұсауы кесілді. Сал­танатты шараға қалалық ақса­қалдар кеңесі мен жергілікті басқармалар және ата-аналар қатыс­ты. Өскеменнің экологиялық таза ауданынан бой көтерген көрік­ті жаңа мектептің ашылу рәсімін­де мерекелік дастарқан жайы­лып, меймандар Наурыз көже­ден дәм татты. Өскемен қаласының әкімі Те­мірбек Қасымжановтың айтуынша, жаңа мектеп шаһардағы заманауи құрал-жабдықтармен толық жа­рақтандырылған алдыңғы қатар­лы білім ордаларының санатында. – Бұл мектепте білім алатын оқу­шыларымыз ғылым мен өнер са­ласында үздік нәтижелер көрсе­теді және келешекте елімізді алға жетелейтін азаматтар болады деп сенемін, – деді қала әкімі. Сондай-ақ, шаһар басшысы жаңа шағын ауданда инфра­құ­рылымды дамыту, әлеуметтік нысандар салу бағытында ауқымды құрылыс жұмыстары жүргізіліп жатқанын атап өтті. Алдағы уақытта мектеп ауласында спорт алаңы мен теннис кортын ашу жос­парланып отыр. Жібек маталар комбинаты шағын ауданының жанынан салынып жатқан №19 аудан жыл өткен сайын түрленіп, өсіп келеді. Жаңа ауданның тұрғындар қатары артқан сайын әлеуметтік нысандардың да қажеттілігі туындап отыр. – Мектебіміз 1000 орынға есеп­теліп салынған. Қазір 936 оқу­шымыз бар. Мектеп бір ауысым бойынша жұмыс істейді. Жаңа инно­вациялық технологиялар енгізілген, оқушылар үш тұғырлы тіл бағдарламасы бойынша оқыты­луда, – деді мектеп директоры Гүл­фарида Ауғанбаева. Аталған білім ордасында бір­қа­тар үйірмелер құрылып, таңдаулы пәндер бойынша тереңдетіп оқыту жолға қойылған. Наурызда тұсауы кесілген келесі нысан – мемлекеттік-жеке әріп­тестік бағдарламасы аясында са­лынған «Азамат» бала­бақша-бөбекжайы. 120 орынға лайық­талған балабақша корпусы заман­ға сай жабдықталған. Қазіргі кезде облыс орталығында 1-ден 3 жасқа дейінгі бүлдіршіндерді мектепке дейінгі мекемемен қамту деңгейі 93,4 пайызды құраса, 3-тен 6 жасқа дейінгі балаларды балабақшамен қамту 99,2 пайызға жетіп отыр. Думан АНАШ, «Егемен Қазақстан». ӨСКЕМЕН.