Шымкентте халықаралық инвестициялық форум өтеді

ШЫМКЕНТ. 28 наурыз. Шымкент қаласында халықаралық инвестициялық форум өтеді. Бұл туралы egemen.kz тілшісі хабарлады. Оңтүстік Қазақстан облысы әкімінің орынбасары С.Тұяқбаевтың айтуынша, «Ontustik Invest - 2016» форумы осы жылдың 28-29 сәуірі күндері «Rixos Khadisha Shymkent» қонақ үйінде өтеді.  Ол облысты шетелге танытуды және өңірге шетел инвестициясын тарту мақсатында ұйымдастырылады. «Ауыл шаруашылығы, тамақ және жеңіл өнеркәсіп, фармацевтика салалары біздің өңір үшін маңызды тақырып. Себебі, бұл салалар басқа өңірлермен, елдермен салыстырғанда біздің аймақта жақсы дамыған. Сондықтан, өңірге шетелдік инвесторлардың қызығушылық танытуы заңдылық. Мәселен, көршілес Қытай мемлекетінде біздегі органикалық таза, сапалы тағамдар жоғары сұранысқа ие. Ондағы баға ұсынысы да біздің кәсіпкерлердің көңілінен шығады. Бүгінде келіссөздер жүргізілуде. Міне, осындай жан-жақты жұмыстардың арқасында облыс шаруалары өнімдерін экспорттауға мүмкіндік алады. Сол себепті, бұл форумның ОҚО үшін маңызы зор», деді облыс әкімінің орынбасары. Бақтияр Тайжан. Дерек, сурет: egemen.kz