6 000 көшет екі айда егіледі

Шығыс өңірінде көктемгі са­нитар­лық айлық басталды. Өт­кен сенбіде облыс орталығының тұрғындары қала аумағын тазалау, көріктендіру және көгалдандыру жұмыстарын жүргізді. Сенбіліктен шаһар басшысы Темірбек Қасым­жанов та тыс қалған жоқ. Қолына күрек пен тырма ұстаған әкімдік жетекшісі қаланың жаңадан бой кө­теріп келе жатқан №19 шағын ауданындағы тазалық жұмыс­тарына қатысты. Екі айға созылатын санитарлық тазалық жұмыстарына қаладағы 27 ірі кәсіпорын, 12 жергілікті өзін-өзі басқару комитеті, 14 қала­лық бөлім және облыстық депар­­таменттер мен басқармалар, сту­денттер атсалысады. Жалпы алғанда, 6 мыңға жуық адам мен 100 техника шаһарды қыс бойы жиналған қоқыстан арылтады. Бұл жолы тұрғындардың ортақ күш-жігерімен саябақтар мен скверлер, аулалар тазаланды. Сондай-ақ, 500-ден астам жас көшеттер отырғызылып, 400 текше метрге жуық қоқыс қала аумағынан шығарылды. Жаңа шағын ауданда ашылған №46 орта мектептің маңайы мен К.Маркс даңғылы бойындағы тазалық шаралары барысында 100-ден астам көшет егілді. Қала әкімінің орынбасары Арман Ысқақовтың айтуынша, қаланы санитарлық тазалауға арналған екі айда 6 мыңнан астам жас көшет отырғызу жоспарланып отыр. – Қаланың барлық аудан­дарының тұрғындары сенбілікке белсене қатысып жатыр. Тұр­ғындар тарапынан терең түсі­ністік, қоршаған ортаға деген қамқор көңіл байқалады. Сондықтан да олар тазалық шараларына үлкен үлес қосуда, – деді Арман Ысқақов. Думан АНАШ, «Егемен Қазақстан» ӨСКЕМЕН