Шекарадағы аудан қатерлі аурудың ордасына айналды

ҚОСТАНАЙ. 26 сәуір. Адамның иммундық тапшылығы вирусы (АИТВ) таралуы жөнінен Қостанай облысының Ресеймен шекарасында жатқан Қарабалық ауданы «көш бастап» тұр. Облыстық жұқпалы иммундық тапшылық синдромы (ЖИТС) орталығының мамандары мен Қарабалық аудандық әкімдігі жанындағы тұрғындар денсаулығын қорғау жөніндегі үйлестру кеңесінің отырысында аудандағы эпидемиологиялық жағдай күрделі екенін айтылды. Бұл туралы aina.kz сайтына сілтеме жасаған egemen.kz тілшісі хабарлады. Қарабалық ауданы облыс бойынша АИТВ-нің көптігі жөнінен бірінші орын алса, ал Қостанай облысы республика бойынша бесінші орында тұр. Бұл да көңіл жұбатарлық көрсеткіш емес. Мамандар қатерлі аурудың аядай ғана Қарабалықта жылдам тарауын оның шекарада орналасуымен байланыстырады. Соңғы үш айдың өзінде  «Қайрақ» шекаралық бақылау бекетінде заңсыз есірткі айналымындағы 4 оқиға тіркелді, оның біреуі есірткіні заңсыз дайындаған және өңдеген. Аудандық ішкі істер бөлімінде 13 нашақор тіркеуде тұрады. Орталық аурухананың бас дәрігері Бектерхан Шымпейісовтың айтуынша, бұл мұзтаудың беткі жағы ғана, есірткі пайдаланатындар ауданда мұнан әлдеқайда көп екені аян. Ауруханаға ай сайын есірткі пайдаланып, есінен танған 10-15 адам түседі екен. Қатерлі вирусты тарататындар солар екенін айтты мамандар. Ауданда 2000-шы жылдың басынан бері адамның иммундық тапшылығы вирусын жұқтырған 41 адам тіркелген. Жұқпалы иммундық тапшылық синдромымен ауыратындар жоқ деп есептеледі, вирусты жұқтырған 10 адам өлген. Олардың басым көпшілігі жұмыссыздар, негізінен 30 бен 40 жас аралығындағы адамдар. АИТВ-ны жұқтыратындар негізінен ер адамдар. 16 жыл ішінде вирусты жұқтырған сегіз екіқабат әйел тіркелген. Ауданда қатерлі вируспен ауыратындарды тіркеуде, анықтауда қиындықтар бар. Жұқтыратындар берекесіз отбасының мүшелері, құжаттары бола бермейді, емханаға тіркелмейді. Оның сыртында ауданда өзге мемлекеттен келген мыңнан аса адам келісіммен тұрып жатыр. Олар тек қатты, оқыс ауырғанда ғана ауруханадан көмек сұрайды. Осының барлығы да АИТВ диагностикасын қиындатып отыр. Нәзира Жәрімбетова. Дерек, сурет: aina.kz.