Жеңімпаз журналистер анықталды

Кеше Бас редакторлар клубы Еуразиялық топтың қолдауымен қазақ тілді журналистер арасында өткізілген дәстүрлі VI «Алтын қалам» байқауының жеңімпаздарын марапаттады. Онда «Үздік мақала» номинациясы бойынша жүлделі екінші орынды әріптесіміз, «Егемен Қазақстан» республикалық газе­тінің Қостанай облы­сын­­дағы меншікті тілшісі Нәзира Жәрімбетова жеңіп алды. Бұл байқаудың басты мақ­саты – Еуразиялық топ кәсіп­орын­­дарында жұмыс істейтін, өндіріс­тегі қарапайым еңбек адамдарын бүгінгі бейбіт заманның қаһар­­ман­дары ретінде үлгі етіп, на­си­­хат­тау. Алты жылдан бері жал­­ға­сып келе жатқан байқауға осы жолы республикалық және өңір­лік басылымдардың, сондай-ақ, теле­дидар, радио және интер­нет жарияланымдарының 37 жур­налисі ниет білдіріп, 133 мақала мен бейне-аудио материалдарын жіберген екен. Оның арасында 22 тілшінің 57 материалы талап­қа сай деп танылып, комиссия талқы­сына түсіп, оң бағасын алған. Жүлделерді тапсыру рәсімі­не ERG аппарат жетекшісі Сейіт­қали Рахимов, Бас редакторлар клубының президенті Бибігүл Жексенбай, «Егемен Қазақстан» республикалық газеті» АҚ Басқар­ма төрағасы Дархан Қыдыр­әлі,  «Қазақстан РТРК» АҚ бас­қарма төрайы­мының өндіріс жө­ніндегі орын­басары Қайнар Олжай қаты­сып, жеңімпаздарды марапаттап, сыйлықтарын тапсырды. Байқау жеңім­паз­­дарына ар­нал­ған жүлде қоры 2 млн. тең­ге екенін айтып өткеніміз жөн. «Жегені жантақ, арқалағаны алтын» деп Шерхан Мұртаза айт­қандай, жақ­сыны да, қиындықты  да жүгіріп жүріп елге жеткізуге асығатын қаламы жүй­рік журналистер мұндай құр­мет­ке әбден лайық. Ол жөнінде Еура­зия­лық топтың өкілі мен Бас редакторлар клубының мүше­лері айтып өтті. Астанада ұйым­дас­тырылған шара­ға БАҚ өкілдерімен қатар бір­қатар, оқырмандар және көрер­­мен­­дер мен тыңдармандар қатысты. Өз кезегінде сөз алған «Егемен Қазақстан» РГ» АҚ Басқарма төрағасы Дархан Қыдырәлі әріп­тес­терді жүлделерімен құттықтай отырып, үнемі сөз майданының алдыңғы шебінде жүріп, халыққа шынайы ақпарат жеткізуді кәсіп еткен алтын қалам иелеріне жүрекжарды тілегін жеткізді. Алтыншы рет өткізіліп отыр­ған «Алтын қалам» байқауы­ның бұл жолғы жүлделері негізінен аймақтардағы журналистердің «қанжығасына» байланды. Соны­мен, «Үздік мақала» номина­циясы бойынша 1-орынды «Ақ­төбе» газетінің тілшісі Кәмшат Қопаева, 2-орынды «Егемен Қазақ­стан» газетінің Қостанай облы­сындағы меншікті тілшісі Нәзира Жәрімбетова иеленді. Ал «Үздік сюжет» номинациясы бойынша 1-орынды «Астана» теле­арнасының журналисі Айгүл Шай­химова, 2-орынды 24.KZ теле­арнасының Павлодардағы мен­шікті тілшісі Қарлығаш Қасиетова жеңіп алды. Сондай-ақ, 3-орын «Қазақстан» РТРК Қара­ған­ды облыстық фи­лиалының жур­налисі Әшім­хан Жанпейісов пен Павлодар облыстық «Халық» радиосының тілшісі Раушан Сы­бан­жановаға бұйырды. Нұрбай ЕЛМҰРАТОВ, «Егемен Қазақстан» АСТАНА Суретте: «Алтын қалам» бай­қауының жүлдегері Н.Жәрімбетова