Әбіш Кекілбаев туралы деректі фильм көрсетілді

Заңғар таулар алыстаған сайын биіктей түседі. Қазақтың кемеңгер ұлы, кестелі тілмен өрнектеген өміршең шығармаларын әлем мойындаған талантты жазушы, белгілі қоғам қайраткері Әбіш Кекілбаев әлемі де өмір көші ілгерілеген сайын сағынта түсері, аңсаулы ойға жетелей түсері сөзсіз. Міне, осындай сағыныштан туған тағы бір тағылымды кеш Ақтөбе гуманитарлық колледжінде өтті. Ел тарихында айрықша орны бар көрнекті мемлекет және қо­ғам қайраткері, сарабдал сая­сат­­кер, Қа­зақ­­станның халық жазушысы, Еңбек Ері Әбіш Кекілбаевтың өмі­­рі мен шығармашылығына ар­налған «Ғұлама тұлға, ғиб­ратты ғұмыр» атты әдеби-та­ным­дық кешті облыстық тілдерді дамы­ту басқармасы мен осы кол­ледж ұжымы Қазақстан хал­қы­ның тілдері күні  мен ел Тәуел­сіз­дігінің 25 жылдығына орай бірлесе ұйымдастырды.  Шараға зиялы қауым өкілдері, колледждің оқытушылық құрамы мен студенттер қатысты. Кештің мақ­саты барлық өмірін тәуелсіз мем­лекетіміздің қалыптасуы мен ру­­­хани дамуына арнаған  Әбіш Кекілбаевты еске алу, өнегелі өмірі мен өнерін жас ұрпаққа үлгі ету болып табылады. Әдеби кештің шымылдығын М.Оспанов атындағы Батыс Қазақ­­­­­стан мемлекеттік медицина университетінің оқытушысы, айтыскер ақын Жұлдыз Қожабекова  тума талантқа арнаған толғауымен ашты. Шара барысында  «Абыз аға. Әбіш аға» атты деректі фильм көр­сетілді. Кездесуде сөз алған белгілі қоғам қайраткері, философия ғы­лым­дарының докторы Амангелді Айталы  талантты тұлға туралы тұшымды әңгіме өрбітті. Өзі Парламент Сенатының депутаты болған кезде Әбіш Кекілбаевтың Парламент Мәжілісінің депу­таты ретінде тіл мәселесіне қа­тыс­ты күрескерлік қасиеті айқын көрінгенін тілге тиек ете келіп, жазушылық шеберлігі мен аза­мат­­тық адамгершілігін айтып берді. Ақын, көсемсөзші, «Шам­шырақ – Ақтөбе» ЖШС директоры Мейірхан Ақдәулетұлы жас­­тарға ана тілін ардақтау, құр­мет­теу керектігін жеткізді. Ол Әбіш Кекілбаевтың  белгілі қоғам қайраткері, талант­ты жазушы бола тұра, өте кішіпейіл, адамгершілігі мол адам болғанын айта келіп, «Әбіш туралы айту да керек, ең дұрысы Әбіш шығармаларын оқу қажет. Бұл сендердің ұлтжанды аза­мат болып қалыптасуларың үшін өте-мө­те қажет», – деп түйін­деді сөзін. Кеште гуманитарлық колледж­дің шығармашыл жастары Әбіш Кекілбаевтың өлеңдері мен көсем­­сөздерінен үзінділер оқып, «Үркер», «Елең-алаң» роман­дары­нан театрландырылған қо­йы­лым көрсетті. Колледж кітап­ханасы мен С.Жиенбаев атындағы облыстық жасөспірімдер кітап­ханасы бірігіп, Әбіш Кекілбаев шығармашылығынан кітап көр­месін ұйымдастырды. Сатыбалды СӘУІРБАЙ, «Егемен Қазақстан» Ақтөбе