Жасыратыны жоқ, ел футболшылары құрамаға бас бапкер болып Александр Бородюк келгелі ұпайға жарымай-ақ қойды. Ресейлік маманның қарамағында жаттыққан кезінде Қазақстан футболшылары төрт ойынның бәрінде жеңіліске ұшырады. Алдымен жолдастық кездесуде Кипр құрамасына 1:3 есебімен есе жіберді. Одан кейін 2018 жылғы әлем чемпионатының іріктеу кезеңінде Армениядан 0:2, Даниядан 1:3 және Черногориядан 0:3 есептерімен жеңілді.
Бұрнағы күні Черногориямен өткен бәсекенің бірінші бөлігінде қандай да бір команда басымдық танытты деп айта қою қиын болды. Матч алма-кезек шабуылмен өрбіген. Дегенмен, жекелеген тұстарда қонақтардың бір жеңнен қол, бір жағадан бас шығара білген ұйымшыл ұжым екендігі байқалып тұрды. Оның үстіне, олар жекелеген ойыншы-ларының шеберлігі жағынан да біздің футболшыларға қарағанда, әлдеқайда тәуір көрінген.
Жалпы, Любиша Тумбаковичтің шәкірттері бұл ойында «Е» тобындағы түйіспе матчтан бірден бір дәмелі команда екендіктерін көрсетті. Матчтың 31-минутында қонақтардың шабуылшысы Стеван Йоветич тамаша пас беріп Марко Вешовичті біздің қақпашымен бетпе-бет шығарды. Обалы нешік, Давид Лория тайсалмастан қарсы ұмтылған. Бірақ, айлалы Вешович допты қақпашыдан әдемі асырып, есепті ашып кетті.
Арада алты минут өткенде біздің ойыншылардың есепті теңестіруге мүмкіндігі болған. Ғафуржан Сүйімбаевтың әуелете берген пасын Исламбек Қуат баспен ұрған еді, доп қақпаның маңдайшасына тиіп, кейін серпілді.
Екінші таймда «қаратаулықтардың» шабуылшысы Фатос Бечирай стандартты жағдайдан тебілген допқа бәрінен бұрын жетіп, баспен гол соқты. Ал кездесудің 63-минутында Марко Симич қақпашы Лорияны тағы да қапы қалдырып, үшінші допты енгізді.
Сонымен, футбол әлемінде «Қаршыға» деп аталып жүрген Қазақ елінің командасы Черногория құрамасынан осымен екінші рет жеңілді. Былтыр, қазан айының 8-і күні біздің футболшылар Черногория жерінде 0:5 болып тізе бүккен болатын.
Бүгін Қазақстан құрама командасы «Е» тобында көш бастап келе жатқан Польша елінің футболшыларымен күш сынасады.
Қайрат ЖҮНІСҰЛЫ
