Жалпыұлттық іс-шаралар жоспары қолдау тапты

Әлеуметтік жағдайды жақсарту ескерілген

Құжатты Премьер-министрдің орынбасары – Ұлттық экономика министрі Нұрлан Байбазаров ұсынды. Жоспар экономиканың орнықты өсуін қамтамасыз етуге және азаматтардың әлеуметтік жағдайын жақсартуға бағытталған 76 іс-шарадан тұрады.

Мемлекет басшысының тапсырмаларын орындау мақсатын­да білім беру, денсаулық сақтау және спорттың қолжетімділігі мен сапасын арттыру, оның ішінде қаржыландыру реформасы мәселелері жөніндегі шаралар көз­делген. Аталған мақсаттарда мемлекет-жекеменшік әріптестік тетігін, «әлеуметтік әмиян» құралын пайдалану, білім гранттарын саралау және басқа да тетіктерді қолдану қарастырылған. «Ақша баланың соңынан жүреді» қағидаты бойынша мемлекеттік тапсырыс шеңберінде мектепке дейінгі тәрбие мен оқытуды қаржыландырудың сараланған тәсілі моделіне ерекше назар аударылды.

Келесі жылы жұмысшы маман­дық­тары жылын өткізу бойынша жекелеген іс-шаралар көзделген.

Өнеркәсіп саласында отандық шикізат пен компоненттерді барынша пайдалану, жүйе құраушы кәсіпорын­дардың айналасында ілеспе өндірістер құру және басқа­ларды ескере отырып, ірі жобалар жүзеге асырылады. Агроөнеркәсіп кешені желісі және «Ауыл аманаты»  жобасын іске асыру бойынша жекелеген шаралар қабылданатын болады.

Сондай-ақ жоспарға энергетика және коммуналдық шаруа­шылықтағы инфра­құрылымдық мәселелерді шешу, теміржол жүк тасымалының ретте­летін тариф­терін алдағы 3 жылда рентабель­ділік деңгейіне дейін бекіту, су қауіпсіз­дігін қамтамасыз ету, ЖИ енгізу, Жолдаудың басқа да бағыттары қамтылған.

Премьер-министр ұсынылған Жалпыұлттық іс-шаралар жос­парының жобасы Мемлекет басшысы қойған міндеттерді сапалы әрі жедел шешуге бағытталғанын баса айтты.

«Басты міндет – Жоспардың іс-шараларын тиімді және уақтылы орындау. Үкімет пен әкімдіктер экономиканың орнықты өсуін қамтамасыз ету және азамат­тарымыздың әлеуметтік жағда­йын жақсарту бағытында белсенді шаралар қабылдайтын болады. Жоспарда көрсетілген заң жобаларын уақтылы әзірлеу қажет. Оған сарапшыларды тарта отырып, терең талдау және талқылау жүргізу керек», деді О.Бектенов.

Үкімет басшысы қаржыландыру мәселелерін жете пысықтауды тапсырды. Артық шығындар­дан бас тартып, бюджет қаража­тын бірінші кезектегі және стратегиялық мақсаттарға ғана бағыттау керек.

Мәселені қарау қорытындысы бойын­ша дауыс беріліп, нәтиже­сінде, Жалпы­ұлт­тық жоспар жобасы бірауыз­дан қолдау тапты. Ұлттық эконо­мика министрлігіне Үкімет аппараты­мен бірлесіп, Мемлекет басшысы­н­ың тиісті Жарлығының жобасын Президент Әкімшілігіне енгізу тапсырылды. Премьер-министрдің орынбасарларына жоспар бойынша бекітіл­ген тармақтардың іске асырылуын бақылауды және үйлестіруді жүктеді.

Кәсіптік-техникалық білім жаңарады

Отырыста жұмысшы маман­дықтары бойынша кадр даярлау және олардың біліктілігін жетіл­діру, сондай-ақ аталған кәсіптердің беделін арттыру жөніндегі шара­­лар талқыланды. Мәселеге қатысты Оқу-ағарту, Ғылым және жоғары білім, Еңбек және халықты әлеумет­тік қорғау министрлері баян­дама жасады. Сондай-ақ «Атамекен» ҰКП төрағасы Райымбек Баталов және өңірлік колледж басшылары тыңдалды.

2025 жыл «Жұмысшы маман­дық­тары жылы» деп жарияла­нып, кәсіптік-тех­никалық білім беру­ді елеулі түрде қайта жаңарту жос­парланып жатыр. Аталған өз­герістер кадрлар даярлауға зама­науи жағдай жасауға бағытталған. Бүгін­гі таңда 772 колледжде 15 бағыт бойын­ша мамандар даярланып жатыр. Жұ­мысшы мамандықтары бойынша жұ­мысқа орналасу деңгейі 70%-ға жетеді.

Үкімет басшысы экономика­ның орнықты өсуі мен жаңа өндіріс­терді ашу кезінде елімізде білікті жұмысшылардың жетіспейтінін атап өтті. Білікті кадрлар даяр­лау – мемлекеттік саясаттың маңыз­ды басымдығы болып қала бермек. Сондықтан еңбек нары­ғы­ның, бизнестің және білім алушы жастардың мүдделері мен қажет­тіліктерін ескеретін жүйелі шаралар кешенін әзірлеу керек.

Кейінгі жылдары кәсіптік тех­никалық білім жүйесін дамытуда бірқатар прогрессивті қадамдар жасалды. Қазір колледж­дер жұмысшы мамандықтары бо­йынша тегін оқытылады. Кадрлар даярлауға арналған  мемлекеттік тапсырыс көлемі айтарлықтай ұлғайтылды. Бұған дейін колледждерге бюджет есебінен  жыл сайын 93 мыңға жуық студент қабылданып келсе, осы жылы олардың саны 142,5 мыңға дейін жетті. Биыл колледж студенттерінің стипендиялары 50%-ға өсті. Сонымен қатар білім ұйымдарының материалды-техникалық базасын жақсарту бо­йынша жұмыстар жалғасып жатыр. «Жас маман» жобасы аясында 180 колледжді қайта жарақтандыру үшін республикалық бюджеттен 48 млрд теңге бөлінді.

Премьер-министр қабылданған шара­ларға қарамастан, кадр даяр­лау­­дағы әлеуеті жеткілікті түрде ашылма­ғаны­на – кәсіптік-техни­калық білім беру жүйе­сін жаңарту қажеттігіне назар аударды.

«Халықаралық салалық стандарттар мен сертификаттауды белсенді түрде енгізу қажет. Ол үшін Оқу-ағарту министрлігі жұмыстың сапасына тәуелсіз бағалау жүргізуі керек. Сондай-ақ технологиялық көшбасшыларды айқындай отырып, колледждерді кәсіби бейімдеу мен саралауды аяқтауы қажет», деп атап өтті О.Бектенов.

Білім ұйымдарын ынталандыру жүйесі мен белгіленген KPI колледждерді оқу сапасын арт­тыруға талпындырады.

Негізгі міндет – техникалық және кәсіптік білім беруді реформалау бойынша кешенді жос­пар әзірлеу. Тиісті тапсырма мүдделі мемлекеттік органдармен, әкімдіктермен, «Атамекен» палатасымен бірлесе орындауға Оқу-ағарту министрлігіне беріл­ді. Құжат колледждерді техни­калық жағынан қамтамасыз ету, оқытушылар құрамы мен оқу бағ­дарламаларына қойылатын талаптар, колледждердің жұмыс сапа­сын бағалау және оларды қаржы­ландыру бағытында нақты шараларды қамтуға тиіс.

Сондай-ақ Үкімет басшысы университеттер мен колледждердің білім бағдарламалары ара­сындағы сабақтастықты қамта­масыз ету қажеттігін айтты. Бүгінде еліміздегі 30 жетекші жоғары оқу орны сәйкес білім бағдарламаларын жүзеге асыратын 100-ден аса колледждермен серіктестік орнатқан.

«Дуальды оқытуды белсенді дамытып, мемлекеттік тапсырыс шеңберінде кадрларды нақты кәсіпорындарға мақсатты даяр­лау жүйесін кеңейту қажет. Колледждер жастарымыз бен жұмыс берушілер және инвесторлар үшін «тартылыс орталығына» айналуға тиіс», деді ол.

Еңбек министрлігіне «Атамекен» палатасы салалық мемлекеттік органдармен бірлесіп, тиісті еуро­­палық жіктеуіш негізінде Цифр­­лық дағдылар банкін, ал Ұлттық біліктілік жүйесінің цифр­лық платформасы негізінде түлек­тердің жұмысқа орналасуына жәр­демдесуге сертификатталған колледж түлектерінің тізілімін құру тап­сырылды. Аталған цифрлық шешім­дер түлектерді жұмысқа орналастыру үдерісін жақсартуға мүмкіндік береді.

Сонымен қатар Премьер-министр кәсіпкерлік блокті оқу үдерісіне тартудың және жұмысшы кәсіп­тері бойынша кадр­лар даяр­лаудың маңыз­дылы­ғын атап өтті.

«Әлемдік тәжірибе көрсетіп отырғандай, кадр даярлау сапасы мемлекет, кәсіпорындар мен оқу орындары арасындағы жауапкершіліктің ара-жігін нақты бөлу есебінен қамтамасыз етіледі. Сондықтан біз бизнестің осы үдерістегі рөлі мен белсенділігін арттырғымыз келеді. Біздің бір­лескен жұмысымыздағы ең басты мақсат – колледж түлектері еңбек нарығында сұранысқа ие болып, лайықты жалақы алуға тиіс», деді О.Бектенов.

Жұмысшы мамандықтарының мәртебесін арттыру және кәсіптік-техникалық білім жүйесін дамыту жөніндегі жұмыс шеңберінде Оқу-ағарту, Ғылым және жоғары білім министрліктеріне ұқсас мамандықтар бойынша университеттерде оқуын жалғастырып жатқан колледж түлектеріне арнал­ған гранттар санын ұлғайта отырып, мемлекеттік тапсырыс құрылы­мын қайта қарау туралы тапсырма жүктелді.