Сурет «Егемен Қазақстанның» архивінен алынды
Көктемгі тасқынның салдарынан 3,9 мың тұрғын үй, 100-ден астам кәсіпкерлік субъектісі, 5 білім беру нысаны суға кетті. Шығынды қалпына келтіруге барлығы 87 млрд теңге бюджеттен, түрлі қорлардан демеушілік қаражат бөлінді. Оның ішінде Президент Қ.Тоқаевтың бастамасымен еліміздің аса ірі компаниялары мен қорлары 63 млрд теңге демеушілік жасады.
Петропавл қаласында «Бірлік» атты шағын аудан бой көтеріп, 700 тұрғын үй салынды, сонымен бірге 1394 пәтер сатып алынды. 1899 үй қалпына келтірілді. Барлық тұрғындарға Үкімет белгілеген көлемде өтемақы төленді.
Қазір су бұзып кеткен дамбаларды, құрылыстарды, гидротехникалық жарақтарды қалпына келтіру жұмыстары қарқынды жүргізіліп жатыр. Биылғы қарғын судың да қауіпті болатын түрі бар. Мамандардың айтуынша, Есіл өзенінің деңгейі қалыптағыдай түспеді, оның үстіне жерасты сулары көтерілген, қардың көлемі де аз емес. Сондықтан облыс барлық мүмкіндіктерді пайдаланып, былтырғыдай топан суға жол бермеудің қамын жасап жатыр.
Өткен жылы экономиканың барлық салалары, оның ішінде ауыл шаруашылығы 140, өнеркәсіп 103,3, құрылыс 131,4, сауда 109,6 көлік 124,1% өсімге қол жеткізді. Егін шаруашылығында 6,2 млн тонна астық жиналып, рекордтық көрсеткіш тіркелді. Мал шаруашылығында 17 тауарлы-сүт кешені іске қосылды.
Облыс экономикасын сараптаған мамандар аймақтық жалпы өнім (АЖӨ) құрамында өнеркәсіп өнімдерінің жыл сайын өсіп келе жатқанын айтады. Мысалы, оның үлесі АЖӨ көлемінде 2022 жылы – 16 пайыз, 2023 жылы 19 пайыз болса, былтыр тіпті артты. Бұл – экономиканы әртараптандырудың нақты көрінісі. Бір жылдың өзінде ғана панельдер шығаратын «Nord Panels», май экстракциялайтын «Масло-Дел» зауыты, кебекті бөлшектейтін «BioOperations» цехы, «Қызылжар жолдары кз» асфальт зауыты іске қосылды.
Экономикаға құйылған инвестиция жоспары толық орындалып, 556 млрд теңге болды. Бір жылда 1002 шақырым жол жөнделді, оның 208 шақырымы республикалық маңызы бар, 630 шақырымы жергілікті маңызы бар жолдар. Елді мекендердің 164 шақырымдық ішкі жолдары жөнделді. Қазір облыс жолдарының 84%-ы жақсы, қанағаттанарлық жағдайда деп бағаланып отыр.
Өткен жылы 281 шақырымдық су құбырын тартудың арқасында солтүстікқазақстандықтардың 97,5%-ы таза ауызсуға қол жеткізді. Сонымен қатар 1,5 мың шақырым электр жүйелерінің сымдары мен 10,5 шақырым жылу жүйелерінің құбырлары жаңаланды.
Тұрғын үй құрылысы да облыста қарқын алып келеді. Былтыр 7 мыңнан артық отбасы жаңа тұрғын үйге қол жеткізді. 17 көпқабатты үйлердің құрылысы аяқталды, 1200 орындық бір жатақхана пайдалануға берілді.
Облыс бюджетінің кіріс бөлігі алдыңғы жылдан 6,2%-ға артып, 127,1 млрд теңгеге жетті. Шығыс бөлігі де белгілеген жоспар шеңберінде орындалды. Биылғы жоспарлар арасында жаңа жұмыс орындарын құру, жұмыссыздықты, атаулы әлеуметтік көмек алушылардың үлесін азайту жөніндегі жұмысты жалғастыру басым бағыттар ретінде белгіленген.
Мемлекет басшысының ауыл шаруашылығы өнімін екі жылда екі есеге арттыру жөніндегі міндетін орындауда СҚО көш бастап келеді. 2023 жылы барлық ауыл шаруашылығы өнімінің индексі 756 млрд теңге болса, 2024 жылы 936 млрд теңгеге артты. 2025 жылдың көктемгі егіс жұмыстарына дайындық қалыпты, бүгінге дейін 470 мың тонна тұқым құйылды.
Өнеркәсіп саласында «Радуга» компаниясы «ТехноЭкоПарк» құру инвестициялық жобасын іске асырады. Жаңа жобалардың қолға алынуына орай «Қызылжар» арнайы экономикалық және индустриалдық аймағы 150 гектарға ұлғайтылды. Онда «Ультрадекор», «ІКЕА» компаниялары ағаш өңдеу, жиһаз жасау цехтарын ашпақшы. Ресейлік «Бейкертон» компаниясы кондитерлік бұйымдар, Қытайдың ауылшаруашылық жарақтарын шығаратын компаниясы тракторлар мен тіркемелер құрастыру цехын ашу жобаларын қолға алып жатыр.
Солтүстік Қазақстан облысы
