Елдің әлеуметтік-экономикалық тұрғыда өрістеуі сол қоғамдағы адами фактормен тікелей байланысты. Жан-жақты дамыған, өз ісін жетік білетін қабілетті азаматтар тұтас мемлекеттің ілгерілеуіне үлес қоса алады. Әрі бұл мамандарды қоғамда, әсіресе жастар арасында мейлінше насихаттау кемел келешектің қабырғасын қалағанмен тең.
Президент Қасым-Жомарт Тоқаев 2025 жылды «Жұмысшы мамандықтары жылы» деп жариялады. Осылайша елде биыл құрылыс, ауыл шаруашылығы, өнеркәсіп сынды қарапайым еңбек адамдарына ерекше көңіл бөлінеді. Осы мақсатта «Жастар рухы» жастар қанаты Қостанайдың жоғары оқу орындары мен колледж студенттерін жиып, диалог алаңын ұйымдастырды. Кездесуде жұмысшы мамандарды насихаттау, өндіріс саласын жаңғырту, шетелдік инвестициялар тарту және заманауи жабдықтарды енгізу жайы талқыланды.
– Студенттер қазір осы жұмысшы мамандықтарды оқи отырып, диплом алған соң өз мамандығы бойынша қызмет етуі үшін осындай алаң ұйымдастырып отырмыз. Біздің осы жылға қойған мақсат – Мемлекет басшысы бекіткен жұмысшы мамандықтарының мерейін асыру, олардың қызметін қоғамда кеңінен таныту үшін іс-шараларды көптеп өткізу, – деді «Жастар рухы» Қостанай облыстық филиалының төрағасы Аружан Сәрсембаева.
Спикер ретінде шақырылған дәнекерлеу цехының менеджері Дмитрий Парфенов жұмыс берушілердің жастармен өзара іс-қимылын жақсартуға көңіл бөлу керек екенін айтып қалды.
– Жұмысшы мамандықтарына білім беру жүйесіне, жастарды өндіріске тарту бойынша жұмыс берушілердің тәсіліне де үлкен назар аудару керек. Себебі қазіргі өндіріс алаңдары бұрынғыға қарағанда әлдеқайда заманауи және белгілі бір біліктілік дағдылары мен білімді қажет етеді, – деді Д.Парфенов.
Ақтауда да «Bir tolqynda» диалогтық алаңы ұйымдастырылып, кездесуде туризм және қоғамдық тамақтану салаларының маңыздылығына тоқталды.
– Біздің экономикамыз жұмысшы мамандықтарына тәуелді. Бұл тек дәнекерлеушілер, монтажшылар немесе құрылысшылар емес, сондай-ақ қоғамдық тамақтану саласының өкілдері, аспаздар, басқарушылар да бар. Ақтау туристік өңір болып есептелетіндіктен, бұл сала маңызды. Сол себепті студенттерге қоғамдық тамақтану және қонақүй бизнесін басқару саласында жұмыс істеудің артықшылықтарын түсіндірген рестораторды шақырдық, – деді «Жастар рухы» Маңғыстау облыстық филиалының төрағасы Абзал Марат. Ал Өскеменде қатысушылар жаңа оқу бағдарламалары мен технологиялардың дамуына зейін қойды. Бұл студенттерге қажетті дағдыларды тезірек меңгеруге мүмкіндік береді. Шығыс Қазақстан облысы кәсіподақтар бірлестігі төрағасының орынбасары Айжан Гасанова кәсіподақтардың бұл бастаманы қолдайтынын және жұмысшылардың құқықтарын қорғауда белсенді жұмыс жүргізіп жатқанын жеткізді.
Тараз қаласы да бұл бастамадан тыс қалмады. Алаңда кәсіби дамумен қатар, «Отбасы банкі» арқылы тұрғын үй алу және көлік мәселелері сөз болды.
– «Amanat» партиясы жанында жастарды қолдау жөніндегі өңірлік кеңес жұмыс істейді. Бұл алаңда жастарға қатысты түрлі проблема көтеріледі. Біз осы кездесуде талқыланған мәселелерді алдағы кеңес отырысында қарастырамыз. «Bir tolqynda» бастамасы жұмысшы мамандықтарының еліміздің тұрақты дамуы үшін маңыздылығын көрсетіп, оларды жастар арасында дәріптеп, әртүрлі салалардағы мансаптық өсу келешегін айқындауда маңызды рөл атқарады, – деді Жамбыл облысындағы «Amanat» партиясы жастар қанатының төрағасы Ерғали Рүстемұлы.
