Мерейтойлық жоспарды талқылауға Қазақстан халқы Ассамблеясы төрағасының орынбасары – Қазақстан халқы Ассамблеясы хатшылығының меңгерушісі Марат Әзілханов, Қазақстан халқы Ассамблеясы төрағасының қоғамдық орынбасары Лугмар Буларов, Парламент Сенатының депутаттары, Мәдениет және ақпарат министрлігінің басшылығы, өңірлердің ішкі саясат, қоғамдық даму басқармалары, «Қоғамдық келісім» КММ, ҚХА қоғамдық құрылымдары және республикалық этномәдени бірлестіктердің басшылары, сарапшылар қатысты.
– 2025 жылдың қаңтар-ақпан айларында ҚХА-ның 30 жылдығына арналған еліміздің 25 жоғары оқу орны мен сараптамалық орталықтарында БАҚ-та кеңінен жарияланатын 34 ғылыми-тәжірибелік конференция, дөңгелек үстел, семинар қазірдің өзінде барлық өңірдегі жоғары оқу орындарында өтіп жатыр. Негізінен іс-шаралар 1 наурыздан (ҚХА құрылған күні) басталады. Дәл осы күні бас қаладағы Бейбітшілік және келісім сарайында республикалық форум өтеді. Аудан, облыстардан арнайы делегаттар шақыртылып, Ассамблеяның маңызды межелерін сараптайды. Алғыс айту күнін мерекелеуде «Қайырымдылық керуені» акциясы, ұйымның бастауында болған ҚХА ардагерлеріне құрмет көрсету, этникалық ансамбльдер мен солистер қатысатын фестивальдар, көрмелер, концерттер, хореография, вокал және аспаптық музыка бойынша шығармашылық байқаулар ұйымдастыру көзделеді, – деді М.Әзілханов.
Жиын барысында «Қолданбалы этносаяси зерттеулер институты» ЖШС директорының орынбасары Айгүл Сәдуақасова Қазақстан халқы Ассамблеясының мақсаты бірегейлікті қалыптастыру екенін атап өтті. Ал Сенат депутаты Алишер Сатвалдиев еліміздегі этностық тақырыптардың дұрыс жазылуына, насихатталуына да ерекше көңіл бөлу керек екенін еске салды. Өз кезегінде ҚХА жанындағы Аналар кеңесі төрағасының орынбасары Баян Ахатай былтыр Мемлекет басшысы Қасым-Жомарт Тоқаевтың қоғамдағы 5 кеселмен күресу туралы тапсырмасы аясында «Саламатты сана» жобасын қолға алғанын айтты. Оның айтуынша, мерейтойлық алғашқы іс-шара 12 ақпанда Алматы қаласындағы Достық үйінде «ҚХА-ның 30 жылдығы: Ана мен бала бақыты – қоғамдық тұрақтылықтың негізі» атты дөңгелек үстел жұмысымен басталады.
