Суретте: музей қорына тапсырылған көне жәдігерлер
Бұл іс-шара – өңір тарихын зерттеуге, мәдени мұраны сақтауға және болашақ ұрпаққа жеткізуге бағытталған маңызды қадам. Табыс етілген жәдігерлер қатарынан көне қорымдардан табылған археологиялық артефактілер мен ерекше тарихи мұраларды көруге болады.
«Ұзынбұлақ қорымынан табылған (VII–IX ғғ.) темірден жасалған жебе ұштары, темір үзеңгі мен ілмекті белдік, жылқы әбзелдерінің темір фрагменттері, қола пластиналы жапсырмалары бар ағаш қалдықтары, қола ілмекті белдік, жауынгер белдігінің қола жапсырмалары, пышақтың ұшы, оюлы қыш құмыра фрагменті бар. Сондай-ақ Ұйғыр ауданы Шошанай ауылы маңынан 2023 жылдың маусым айында табылған петроглиф тас та музей қорына табыс етілді. Бұл жәдігерлер аймақтың бай мәдени-тарихи мұрасын таныстыруға, қазақ даласында өмір сүрген ежелгі өркениет іздерін зерттеуге мүмкіндік береді. Көптеген артефакті – ерте түркі дәуірінің әскери, шаруашылық және тұрмыстық заттары», дейді Алматы облыстық тарихи-мәдени мұраны қорғау жөніндегі орталықтың бас инспекторы Еркебұлан Бақабаев.
Облыстық тарихи-мәдени мұраны қорғау орталығы 2022 жылдан бастап тарихи-мәдени ескерткіштерді жинақтау жұмысымен айналысып келеді. Оған әл-Фараби атындағы Қазақ ұлттық университетінің ғалымдары атсалысып, бұзылу және тоналу қаупі төнген обаларға археологиялық қазба жұмысын жүргізіп жатыр. Музей қорына тапсырылған жәдігерлер табанды еңбектің нәтижесін көрсетеді.
Алматы облысы,
Кеген ауданы
