Cұраныстан туған стартаптар

«Smart Zebra»

Қазір балалардың бей­не­ойындарға әуестігі ата-аналар­дың негізгі уайымына айналды. «Әлеуметтік желі жеткіншектің мінез-құлқына, таным-түсінігіне, ментальді һәм физикалық саулығына теріс әсер етіп жатыр», деп дабыл қағады әке-шеше. Үлкендердің өзі де күндіз-түні «WhatsApp» ақтарып, «Instagram» қопарып, виртуалды әлемге қашан әрі қалай батып кеткенін байқамай қалғанда, балалардың телефонға тәуелділі­гін тоқтату тіпті қиын екені айтпаса да түсінікті. Ғаламат жетістік ретін­де жарнамаланып жатқаны­мен, бейнеойындар түгілі, «YouTube» арналарындағы мультфильм­дер де балаға ақыл қоспайды, оның қиялын байытпайды, сөздік қорын дамытпайды, сыни ойлауға баулымайды.

Осыны ескерген «Smart Zebra» жоба­сының авторлары бал­дырғандардың смартфонға тәуел­ділігін азайтуға арналған мобилді қосымша ойлап тапты. Иә, гаджетке тәуелділікті дәл сол құрылғы ар­қылы жеңу біртүрлі кереғарлық сияқты көрінуі мүмкін. Бірақ «қардың басын қар алар» дегендей, телефонға байланған баланы смартфондағы қызықты әрі пайдалы контентпен баурай білу керек. Аталған қо­сымша мультфильм­дер мен ойындарға балама ретінде білім мазмұнын ұсынады. Ол баланың сөйлеу қа­білетін дамытып, ой-өрісін кеңейтеді және интеллектуалдық дең­гейін арттырады. Қа­зір­гі уақытта бұл қосым­ша­ның игілігін мыңнан аса балдырған көріп отыр.

Жобаның авторы Бағлан Аязбаев қосымшаны әуелі балаларына, содан кейін достарына көрсеткен. Стартаптың расымен пайдалы екенін ұққан соң, ол қосымшаны «App Store»-ға жариялап, көпшілікке ұсынған.

«Контенттің барлығын өзіміз әзір­ледік. Қазір қоржынымызда екі жыл бойы жинаған мыңнан астам аудиофайл мен анимация бар. Контент мазмұнын әлде де байытып келеміз. Жақында қосымшаға қаржылық сауат тақы­рыбын қостық, яғни ақша қалай пайда болды, ересектер оны қайдан алады, ақшамен не істеуге болады деген сұрақтардың жауабын бала­ларға қызықты етіп түсіндіреміз. Қазір қосымшада осын­дай 10 тақырып бар. Байқағанымыз, бала­ларға адам денесі мен дино­заврлар туралы контент көбірек ұнайды. Біз әуелден отандық нарықты назар­ға алдық, сондықтан қосым­шаның толықтай қазақ тілін­дегі мазмұны бар. Сұраныс мейлі аз болсын, мейлі көп болсын, қазақша контент міндетті түрде болуы керек. Жақында өзбекстандық бала орыс тіліндегі барлық тақы­рыпты көріп шыққанын, қазір қазақ тіліндегісін көріп жүр­генін айтты. Оның анасы бізге өзбек тіліндегі нұсқасын жа­сауды сұрап хат жазды, ал бала­сы қазақ тіліндегі сөздерді үйре­ніп алыпты», дейді жоба жетекшісі.

Осылайша, стартап авторлары қазіргі гаджетке тәуелді ұр­пақтың болашағына бейжай қарамай, уақыт талабына сай, заманауи әрі тәрбиелік мәні зор инновациялық шешім ұсынды.

 «Squares.kz»

Осы күні той, тренинг, көрме, фото­тү­сірілім секілді түрлі іс-шара ­ұйымдастыруға кең әрі ыңғайлы локация табу – оңай шаруа емес. Сағат­тап іздейтін, телефонмен сан рет хабарласатын, бос күнді нақтылай алмай, ақыр соңында келісімге келе алмай қалатын кез көп. Осы олқы­лықтың орнын толықтыру мақ­са­тында құрылған «Squares.kz» стар­тапы – дәл қазіргі нарық­қа қажетті әрі сұра­нысқа ие жоба.

Жобаның негі­зін қалаушылар Қасым Қабылғали мен Даниил Мац­кевич­тің айтуынша, «Squares.kz»-тің басты ерекшелігі – плат­форманың пайда­ла­нушы­ларға өте ыңғай­лы әрі түсінікті болуында. Қандай да бір іс-шара ұйымдастырғысы келген адам осы жүйеге қонақтар санын, мереке­нің қандай форматта өтетінін, басқа да ұсыныстарын енгізсе болғаны, «Squares.kz» дереу сұранысыңызға қарай бірнеше нұсқаны ал­­дыңызға жа­йып салады. Әрі қа­райғы таңдау жасап, брондау, төлем жасау секілді үдерістер де оңайлатылған. Бұрын мұндай іздеу жүйесі бірнеше сағатқа созылатын. Енді бәрі бір платформада шоғырланғандықтан, бүкіл үдеріс 5–10 минуттан аспайды.

Жобаның негізін қалаушы Қасым Қабылғалидің айтуын­ша, кез келген адам осы сайт­қа кіріп, платформаның жаңа нұсқасын қолданып көре алады.

«Пайдаланушы локацияны брондап, сол жерге барды делік. Егер қызмет көрсету сапасына көңілі толмаса, тапсырыстан бас тартып, ақшасын қайтара алады. Сонымен қатар клиенттердің пікірі де ескеріледі. Мәселен, ең алғаш­қы жағымсыз пікір жазыл­ған кезде ғима­раттың рейтингі төмен­дейді. Сөйтіп, ол мекеме тізімнің ортасына қарай құл­дилайды. Екінші кезеңде ең соңғы орынға жайғасады. Бұл жағдай үшінші рет қайталанса, ол орын платформадан мүлдем өші­ріледі. Осы­лайша, біздің қосымшада үздік локациялар ғана ірікте­ліп қалады. Бұл жүйе­мен жұмыс істейтін елімізде бірен-cаран ғана бәсекелесіміз бар. Олар – әдетте «Olx» немесе «Крыша.kz» сияқты хабарландыру платформалары. Мұнда клиент­тер ғимарат иесіне телефон соғып, «WhatsApp» арқылы фото жіберіп, сосын кездесіп, төлем жасап жатады. Бірақ бұл – ескірген модель», дейді Қасым Қабылғали.

Қазіргі таңда «Squares.kz» «Astana Hub» пен «Google for Startups» ұйым­дастырған «Silkway Accelerator» бағдар­­ламасының үшінші легіне қатысып, маркетинг, қаржы, клиентпен жұмыс сынды бағытта білімін тереңдетіп, жобаны жаңа деңгейге көтерген. Аталған платформа – нарықтағы олқылықты көріп, нақты сұранысқа сай құрылып отырған заманауи әрі өміршең жоба. Тек табыс табуды емес, қоғамның сұранысын өтеуді көздейтін мұндай стартаптар еліміздің цифрлық әлеуетін жаңа белеске көтерері анық.

 «Zoob.kz»

Қажетті құрал-жабдықтар мен меди­ци­­налық материалдарды сенімді көзден, қолайлы бағамен жылдам табу ­– еліміз­дегі стоматологиялық клини­калар­дың басты қиындығының бірі. Тауар тасы­малдайтындарға қоңырау шалып, баға­лар­ды салыстыруға, жабдықтардың сапасын аны­қ­тауға, келісімшарттарды рәсімдеуге біраз уақыт кетеді. Жақында осы мәселені шешу ниетімен «Zoob.kz» стартапы құрыл­ған еді.

Жобаның негізін қалаушы – Мәди Ағатаев. Ол медицина саласында 10 жылдан астам еңбек еткен, 7 жыл бойы стоматология бағытында жұмыс істеген. Сонымен қатар стоматологиялық жабдықты жет­кі­зе­тін оңтүстіккореялық компанияда біраз тәжірибе жинаған. Осылайша, саладағы кемшіліктерді көзі­мен көрген кәсіпкер нақты қажет­тілікке сай өнім жасауды мақсат еткен. Соның нәтижесінде «Zoob.kz» жобасы дүниеге келді.

«Біз медициналық тауарлар нары­ғының ашық, қауіпсіз әрі толық заңды болуын қалаймыз. Себебі нарықтағы өнімдердің айтарлықтай бөлігі күмәнді. Тіпті кейбір жасанды тауарлар уәкілетті органдардан қаймықпай, ашық түрде саудаланып жатыр. Сондықтан біз заңды түрде тіркел­меген және сапасыз тауарлармен жұмыс істемейміз. Болашақта ел нарығын осындай күмәнді тауарлардан тазартуға бастамашы болғымыз келеді. Барлық стоматологиялық емхана тек сертификатталған өнімдерді сатып алуы керек деп есептейміз, ал науқастар тек жоғары сапалы әрі дәлелденген дәрі­лермен емделуге тиіс. Біздің миссиямыз осы», дейді Мәди Ағатаев.

Оның айтуынша, елімізде стома­тологиялық емханаларға зат жет­кізе­тіндер көп емес. Нарықта шамамен 100–150 компания бар. Бұл – күнделікті тұтыну нарығымен салыс­тыр­ғанда өте аз көр­сеткіш. Сала шағын болғанымен, сұраныс жоғары. Бірақ ең басты мәселе – қажетті затты жылдам әрі бір жерден сатып алу мүмкіндігінің жоқ­тығы. Ал «Zoob.kz» осы мәселені толық шешуге ұмтылып отыр.

Уақыт пен қаржыны үнемдеуді, сапа мен сенімділікті қалайтын стоматологтер үшін бұл – таптырмас құрал. Қазіргі таңда «Zoob.kz» елімізде сұранысқа ие болып келеді. Алдағы уақытта компания Өзбекстан мен Қырғызстан нарығына шы­ғуды көздеп отыр.