Суретті түсірген – Ерлан ОМАР, «EQ»
Былтыр облыс диқандары рекордтық мөлшерде астық жинап, айды аспанға шығарды. Бұл орайда олардың пікірінше мемлекеттік қолдаудың көмегі молынан тиген. Биыл сол жоғары қарқынды сақтап қалу, одан әрі дамыту міндеті жүктеліп отыр. Мемлекеттік қолдау туралы айтқанда «Кең дала-2» бағдарламасы аясында жеңілдетілген несиенің өңір диқандарына өткен жылдың қараша айынан бастап беріле бастағанына ерекше тоқталған жөн.
– Бұл – жағымды жаңалық, – дейді Зеренді ауданындағы «Құлан» шаруа қожалығының өкілі Құлан Болатов, – бұрын несие қолымызға кеш тиетін, қамданып үлгере алмайтын едік. Жаздың қамын қыста жеп, материалдық-техникалық базамызды нығайтуға мол мүмкіндік туып отыр. Егіс жұмыстарына сапалы дайындалу үшін алдымен қолда бар техникамызды жөндеп алдық. Сапалы тұқымды да қарастырдық. Қажет болып қалуы мүмкін қосалқы бөлшектер қорын жасадық. Осының барлығы – несиенің ерте берілгенінен.
Бүгінде облыстың 600 фермері 66 млрд теңгенің жеңілдетілген несиесін алып үлгерген. Жалпы, облыс бойынша 94,7 млрд теңгеге өтініш түскен. Қазір қосымша қаражат қарастырылып жатыр. Таяуда өткен облыстық аграрлық кеңесте сөз сөйлеген Ауыл шаруашылығы вице-министрі Азат Сұлтанов аграршыларды өнімділік пен тиімділікті арттыру үшін барлық қолжетімді тетікті пайдалануға шақырды.
– Былтыр басталған жеңілдетілген несие беру көмегі биыл да жалғасын табады әрі көлемі ұлғайтылды. Солтүстік өңірдегі ахуал ауа райына тікелей тәуелді. Бірақ өнім сапасына мейлінше мән берілуі керек. Аграрлық несие корпорациясы, екінші деңгейлі банктер, несиелік серіктестіктер, өңірлік инвестициялық орталықтар мен микроқаржылық ұйымдар арқылы несие алуға әбден болады, – деді.
Вице-министрдің мәліметіне қарағанда, биыл ауыл шаруашылығы саласының еңбеккерлері үшін айта қаларлықтай жаңалық бар. Жеңілдетілген лизинг арқылы қаржыландыру көлемі 200 млрд теңгеге дейін көбейген. Ал форвардтық сатып алу бағдарламасы бойынша 30 млрд теңге көлемінде қаржы бөлінген. Облыста көктемгі егіс науқанын ұйымшылдықпен ұйымдастыруға қажетті ресурс жеткілікті. Облыс әкімінің орынбасары Мұрат Балпанның айтуынша, биыл 5,4 млн гектар алқапқа дән сіңірілмек.
Өңірдің агроөнеркәсіптік кешенін дамытуға 200 млрд теңге бөлінді. Оның 63,3 млрд теңгесі субсидия болса, 140 млрд теңгеге жуығы – жеңілдетілген несие мен форвардтық сатып алу. Өнімділікті арттыру мақсатында егіс алқаптарына 336 мың тонна минералды тыңайтқыш енгізу жоспарланған. Өткен жылмен салыстырғанда тыңайтқыш енгізілген алқаптар көлемі 78 мың гектарға көбеймек. Күні бүгінге дейін 66,9 мың тонна тыңайтқыш алуға 226 келісім жасалды. Сапалы тұқыммен қамтамасыз ету бойынша да ауқымды жұмыс атқарылды. Қазір барлық техника дайын. Көктемгі егіс жұмысына 37 мың техника қатыстырылмақ.
Ақмола облысы
