Бұл байқау – С.Бегалиннің бай шығармашылық мұрасын жастар арасында кеңінен насихаттап, балалар әдебиетінің болашағына ерекше мән берудің жарқын көрінісі. Қазақстан Жазушылар одағы, «Өркен» балалар әдебиетін дамытуға жәрдемдесу қоғамдық қоры және Алматы қаласы кітапханалар желісінің ұйымдастыруымен жүзеге асып отырған бастама – еліміздегі жас қаламгерлердің шығармашылық әлеуетін көтеруге бағытталған елеулі қадам.
Байқау екі тілде – қазақ және орыс тілдерінде қатар жарияланған болатын. 9-11 сынып оқушылары С.Бегалиннің «Алданған жолбарыс» және «Жас бұтақ» деген екі әңгімесі бойынша эссе жазды. Барлық қатысушылар үшін байқау талабы былай басталады: кітапханаға келген оқырманның қолына Бегалиннің әңгімелері жинақталған кітап түседі, ол кітапты бас көтермей оқи бастайды, дәл осы мезгілде ауа райы күрт бұзылып, нөсер жаңбыр құйып, найзағай жарқылдап, жарық сөнеді. Кенет, міне, ғажап, қолына телефон ұстап, ЖИ өнімін тұтынып жүрген бүгінгі жасөспірім бала өткен ғасырдың 20-60 жылдарына, Сапарғали Бегалиннің әңгімелерінде суреттелетін өмір мен оқиғаларға тап болады. Уақыт шеңберінен шығып кеткен қиял-ғажайып саяхат сапарында жасөспірім оқушы шығарма кейіпкерлерімен танысып, оларға шыққан тегін, немен шұғылданып, нені құндылық санайтынын, бұл ортаға қалай тап болғаны туралы айтып, көмекке мұқтаждығын білдіреді. Өз оқиғасын өзінше өріп, өрбітуге тиіс қатысушыларға интернет көмегіне жүгінуге тыйым салынды, керісінше, шектеусіз қиял әлеміне еркін бойлап, уақыт жігін аттап өткен таразы пайым шынайы ширатылғаны құпталды.
«Өркен» балалар әдебиетін дамытуға жәрдемдесу қоғамдық бірлестігі алдағы уақытта аймақ шеңберінен шығып, «Қазақстанның жас жазушысы» республикалық байқауын ұйымдастыруды жоспарлап отыр. Ал Алматы қаласының жас оқырмандарының қатарын толықтыра беру үшін «Өркен» мен қалалық орталықтандырылған кітапханалар жүйесі түрлі тапсырмалардың көмегімен балалардың ынтасын оята беруге ниетті.
– Мысалы, барлық отбасы баласына «PlayStation» ойынын сатып алып бере алмайды, сондықтан Алматы кітапханаларының бірінде біз оны тегін ойнай алатын мүмкіндікпен қамтамасыз еттік,– дейді Мәди Нүсіпбаев. – Бірақ оның да шарты бар: «PlayStation» ойнағысы келетін бала кітапханашы ұсынған кітапты оқып, сұрақтарына жауап берсе, кітапхана абонентін ала алады. Кітапханалар қашан да түрлі тақырыптар төңірегінде мазмұнды кездесулер өткізіп, қызықты бастамалардың ұйытқысы болып жүреді, бірақ балалармен жұмысты алға жылжытатын «сиқырлы» кілтін таба алмай, оқуға құштарлығын оята алмай, дәрменсіздік танытатынын жасыра алмаймыз. Сондықтан балаларға байқатпай, олар да бізді байқамай, кітапханаға жиірек келетіндей амал-тәсілдерді бірлесіп іздей беруіміз керек. Балалардың болашағына бейжай қарай алмайтын, олардың өзін шынымен де оқитын елде тұратынын сезінуге мүмкіндік тудырғысы келетін барлық кәсіпкерлер мен қоғамдық белсенділерді біздің жобамызға қосылуға шақырамыз, – дейді «Өркен» балалар әдебиетін дамытуға жәрдемдесу қоғамдық бірлестігінің құрылтайшысы Мәди Нүсіпбаев.
Әдеби байқау жеңімпаздарына кітап дүкендерінің сертификаттары, кітаптар, ал 1-орын алған екі оқушыға планшеттер табысталды. Қазақ тіліндегі шығармалардың арасында С.Бегалиннің «Алданған жолбарыс» әңгімесі негізінде өз эссесін жазған Абай атындағы дарынды балалар мектеп-интернатының оқушысы Шырайлым Айбекқызы, ал орыс тіліндегі байқауда «Сапарғали Бегалиннің сиқырлы әлеміне саяхат» деген эссесімен №52 орта мектептің оқушысы Ренат Бекқұлов жеңімпаз болып танылды. Ренаттың шығармасын Қазақстан Жазушылар одағының хатшысы Фархат Тамендаров өзі бас редакторы болып отырған «Простор» журналында жариялауға уәде етті. Оқушының өзі бұл байқаудың болашақ мамандық таңдауына әсері болғанын жасырмады.
Бұл байқау әдебиет көкжиегінде жаңа есімдердің танылып, қазақ сөз өнерінің келешек кеңістігіне тың серпін берері сөзсіз.
