Фото: Үкіметтің баспасөз қызметі
Семинар Мемлекет басшысы Қасым-Жомарт Тоқаевтың моноқалалар экономикасын әртараптандыру жөніндегі тапсырмаларын орындау аясында ұйымдастырылды. Қатысушылар моноқалалардың даму тенденцияларын, экономиканың құрылымын нығайту, цифрлық шешімдерді енгізу және тұрақты даму жолдарын талқылады.
Сонымен қатар Саран қаласының тәжірибесі ерекше атап өтілді. Индустриялық аймақ құру арқылы қала моноқала мәртебесінен шығып, өңірлік даму драйверіне айналды.
Осылайша, Саранда қолдау шараларының нәтижесінде экономиканы әртараптандыруға ықпал еткен Saran индустриялық аймағы құрылды.
2019-2024 жылдар аралығында қалада өнеркәсіп өндірісінің көлемі 5,6 есе өсті, өңдеу саласының үлесі 92%-ға жетті. Салық түсімдері үш есе өсті. Жаңа зауыттарда 2 мыңнан астам жұмыс орны ашылды, әрі қарайғы жобалар тағы 3,5 мыңға жуық жұмыс орнын қамтамасыз етеді, бұл жергілікті тұрғындарды да, басқа өңірлердің қызметкерлерін де тартады.
Жаңа өндірістер құру жұмыспен қамтудың өсуіне және ШОБ-ты дамытуға, сондай-ақ қалалық инфрақұрылым мен тұрғынүй құрылысын жаңғыртуға ықпал етеді.
Биыл қала экономикасына 76 млрд теңгеден астам инвестиция тарту жоспарланған.
Жалпы, Қазақстанда өңірлерді қолдаудың жүйелі шараларын жүзеге асыру нәтижесінде моноқалалар саны 27-ден 20-ға дейін қысқарды, бұл ірі өндірістердің және экономиканың өзге де түрлі бағыттарының өсуін білдіреді.
Семинар-кеңес қорытындысы бойынша қатысушылар Саран қаласындағы бірқатар өнеркәсіп және әлеуметтік нысандарды аралады.
Қазіргі уақытта Қарағанды облысында төрт моноқала бар – Теміртау, Шахтинск, Абай және Балқаш, онда 340 мыңға жуық адам тұрып жатыр, бұл өңір халқының үштен бірін құрайды. Өңірдегі өнеркәсіп өндірісінің жартысына жуығы моноқалалар үлесіне тиесілі.
