Сурет: senate.parlam.kz
Халықаралық парламенттік одақтың, UN-OHRLLS және Түрікменстан Парламентінің қолдауымен өткен форум барысында тұрақты дамудың негізгі мәселелері, Аваза іс-қимыл бағдарламасын іске асырудағы парламенттердің рөлі, сондай-ақ өңірлік және халықаралық әріптестікті нығайту жолдары талқыланды.
Форум қатысушылары LLDC елдері парламенттері арасындағы күш-жігерді үйлестірудің маңыздылығын атап өтті. Бұл ең алдымен, көлік және сауда инфрақұрылымын дамытуға, есептілікті қамтамасыз етуге және институционалдық тұрақтылықты арттыруға бағытталған заңнамалық бастамаларды ілгерілету үшін қажет. Сонымен қатар теңізге шыға алмайтын елдердің мүдделерін көздейтін көпжақты сауда жүйесін қалыптастыру, бейбітшілік пен сенімді нығайту және тұрақты даму мақсатында парламенттік ынтымақтастықты күшейту мәселелеріне де ерекше назар аударылды.
Форум қорытындысы бойынша Аваза іс-қимыл бағдарламасының мақсаттарын жүзеге асыруға ұлттық парламенттердің белсенді қатысуын және ынтымақтастықтың негізгі басымдықтарын бекітетін Парламенттік декларация қабылданды.
Қазақстан делегациясының мұндай халықаралық іс-шараларға қатысуы еліміздің парламенттік дипломатия саласындағы ұстанымдарын одан әрі нығайтуға, сондай-ақ тұрақты даму мен өңірлік ынтымақтастық салаларындағы ұлттық мүдделерді ілгерілетуге ықпал етеді.
Ауыл тұрғындарымен кездесті
Сенат депутаттарының өңірлерге сапары да жалғасып жатыр. Наурызбай Байқадамов пен Руслан Рүстемов Қызылорда облысының Жалағаш ауданына барып, баламалы энергетика саласындағы жобаның жүзеге асырылу барысымен танысып, ауыл тұрғындарымен кездесті.
Сенаторлар «Nomad Solar» ЖШС-ның күн электр стансасына барды. Нысан 164 гектар аумақты алып жатыр, оның 75 гектарына күн панельдері орнатылған. Станса 2019 жылы іске қосылған және өңірдің тұрақты дамуына үлес қосып, экологиялық таза электр энергиясымен қамтамасыз етіп келеді.
Парламент мүшелері мұндай жобаның елдің энергетикалық тәуелсіздігін нығайтып, экологиялық күн тәртібін ілгерілету үшін маңызы зор екенін атап өтті. Сондай-ақ «жасыл» энергетиканы дамыту мемлекеттік саясаттың басым бағыттарының бірі болып қала беретінін жеткізді.
«Баламалы энергетиканы дамыту – еліміздің экологиялық мақсаттарына қол жеткізу және энергетикалық қауіпсіздігін нығайту жолындағы маңызды бағыт. Мұндай жобалар өңірлердің тұрақты дамуына серпін беріп, экономика үшін жаңа мүмкіндіктер ашады», деді Р.Рүстемов.
Іссапар барысында сенаторлар ауыл шаруашылығы саласында еңбек етіп жүрген Таң ауылының тұрғындарымен де кездесті. Ашық диалог барысында суармалы судың жетіспеушілігі және ауыл шаруашылығы өнімдерін өткізу мәселелері көтерілді.
