Энергетика министрі Ерлан Ақкенженовтің айтуынша, негізгі мақсат – елдің экономикалық өсімі мен азаматтардың әл-ауқатына берік негіз болатын сенімді әрі заманауи энергетикалық жүйе қалыптастыру.
«Электр энергетикасы мен жылумен жабдықтаудағы басты міндет — қуат көздерін арттыру және сенімді инфрақұрылым құру үшін жүйелі түрде жаңғырту жұмыстарын жүргізу», деді министр.
Президенттің тапсырмасына сәйкес, алдағы бес жылда жалпы қуаты 14 ГВт жаңа энергия көздері іске қосылады. Соның ішінде соңғы екі жылда 1,3 ГВт қуат пайдалануға берілді.
Биыл тағы 622 МВт қосу жоспарланса, 2026 жылға қарай шамамен 2 700 МВт іске қосылады.
Қазір Түркістан облысында қуаты 1000 МВт болатын электр стансасы салынып жатыр. Сонымен қатар, Қызылорда қаласында 240 МВт жаңа жылу электр орталығының құрылысы басталды.
