Сурет: egov.kz
Еңбек және халықты әлеуметтік қорғау министрлігінің мәліметінше, былтыр 96,9 мыңнан астам өтінім сырттай форматта қаралған. Бұл – куәландырудан өткен мүгедектігі бар адамдардың жалпы санының 37,4%-ы.
Мемлекет басшысы ерекше қажеттіліктері бар адамдарға барынша қолайлы жағдай жасауды тапсырған болатын. Жауапты министрлікке мүгедектік тобын анықтаушылар инстанциялардан өтуде қағазбастылыққа салынбауын жүктеді. Осы тапсырманы орындау мақсатында Еңбек және халықты әлеуметтік қорғау министрлігі Денсаулық сақтау, Цифрлық даму, инновациялар және аэроғарыш өнеркәсібі министрліктерімен бірлесіп, елдің барлық 20 өңірінде қанатқақты режімде медициналық-әлеуметтік сараптама (МӘС) жүргізудің сырттай форматы жобаны іске асырып жатыр.
Мүгедектік тобын белгілеу жөніндегі қызметті алу үшін өтініш берушіге тұрғылықты жеріндегі емханаға жүгініп, міндетті тексеруден өту қажет. Одан кейінгі шаруаның барлығы ақпараттық жүйелерді интеграциялау есебінен оның қатысуынсыз өтеді.
Сырттай куәландыруға көшу ең алдымен әкімшілік, бюрократиялық кедергілерді жояды. Екіншіден, МӘС сараптамалық шешімдерінің ашықтығын қамтамасыз етеді. Үшіншіден, мүгедектікті белгілеу, мүгедектігі бар адамдарды әлеуметтік қорғау шараларын анықтау қызметтерін үйден шықпай-ақ алуға мүмкіндік береді. Сонымен қатар көрсетілетін қызметті алушының мүгедектік тобын белгілеуші мекеме қызметкерімен тікелей байланысын болдырмайды. Нәтижесінде, сыбайлас жемқорлық тәуекелдері азаяды.
