3 қыркүйекте С.Тангал мырза елшілікте еліміздің бірқатар БАҚ өкілдерін қабылдап, өзінің алдағы жұмысы жайында баяндап, екі елдің байланысын одан әрі тереңдету туралы ойларымен бөлісті.
«Мен жақында Жоғары мәртебелі Қасым-Жомарт Тоқаевқа Сенім грамотасын табыстадым. Қазақстан секілді ғажайып әрі жедел дамып келе жатқан елде Үндістан Республикасының өкілі ретінде қызмет ету – мен үшін үлкен абырой. Үндістан мен Қазақстанды көпғасырлық бай тарихымыз, мәдени ұқсастығымыз және өзара құрмет байланыстырады. Қазіргі таңда біздің қарым-қатынасымыз стратегиялық серіктестік негізінде дамып келеді. Қазақстан Үндістанның «кеңейтілген көршілік» саясатында айрықша орын алады», деді елші.
Оның айтуынша, екі мемлекет БҰҰ, ШЫҰ, Азиядағы өзара ықпалдастық пен сенім шаралары жөніндегі кеңес секілді ұйымдар аясында сенімді одақтас саналады. Тараптар энергетика, фармацевтика, ақпараттық технология, ғарышты игеру, қорғаныс, білім, мәдени салаларда ынтымақтасып жұмыс жүргізіп келеді және әлі де іске асырылмаған өзара байланыс әлеуеттері жоғары.
«Алдағы айларда Қазақстан Үкіметімен, бизнес қауымдастықпен, академиялық ортамен және жалпы қоғаммен байланысымызды тереңдете береміз деген үміттемін. Өзара барыс-келіс, іскерлік миссиялар және мәдени бастамаларымыз жалғасын тауып, халықтарымыздың жақындасуы мен стратегиялық серіктестігіміздің дамуына үлесімізді қоса береміз», деді С.Тангал.
Елшімен кездесу өзара пікір алмасу түрінде өтіп, журналистер тарапынан экономика, білім, жасанды интеллект салаларындағы байланыстар мен тәжірибе алмасулар жөнінде сұрақтар қойылды. С.Тангал қазіргі таңда біздің елімізде, атап айтқанда, Алматы, Астана, Қарағанды, Семей, Петропавл қалаларында 12 мыңдай үнді студенті білім алатынын, олардың басым бөлігі медициналық мамандықтарды таңдағанын атап өтті. Сонымен қатар кейінгі жылдары Қазақстанға келетін үнді туристерінің де саны артып келеді.
