Еңбек және халықты әлеуметтік қорғау министрлігінің мәліметінше, ОЦК мемлекеттік органдардың қолданыстағы барлық ақпараттық жүйелерінің деректері негізінде қалыптастырылады. Бүгінде еліміздің 20,2 млн азаматы (6,2 млн-нан астам отбасы) туралы ақпарат жинақталған.
ОЦК енгізудің басты мақсаты – ел азаматтарының мемлекеттік қолдау жүйесіне тең қолжетімділігін қамтамасыз ету. Әлеуметтік кодексте ОЦК әлеуметтік саясаттың орта және ұзақмерзімді міндеттері мен бағыттарын айқындау құралы ретінде белгіленген. Сондай-ақ ОЦК азаматтардың әлеуметтік мәртебесіне байланысты кепілдендірілген мемлекеттік қолдаудың да бір түрі.
Қазірде ОЦК мемлекеттік қолдау шараларын алуға құқығы бар жандарға қандай да бір өтінішсіз жәрдемақылар мен әлеуметтік төлемдердің 11 түрін ресімдеуге мүмкіндік береді. Олар: еңбек ету қабілетінен айрылған жағдайда әлеуметтік төлем; жұмысынан айрылған жағдайда әлеуметтік төлем; асыраушысынан айырылу бойынша әлеуметтік төлем; баланың тууына, бала бір жарым жасқа толғанға дейін оның күтіміне байланысты жәрдемақылар; мүгедектігі бар баланы тәрбиелеп отырған ата-анасына (қамқоршысына) жәрдемақы; мүгедектігі бойынша жәрдемақы; көпбалалы отбасыларға берілетін жәрдемақы; «Алтын алқа», «Күміс алқамен» марапатталған көпбалалы аналарға берілетін жәрдемақы; атаулы әлеуметтік көмек; сондай-ақ жерлеуге арналған біржолғы төлем.
Мемлекеттік қолдау шараларын алуға құқық белгіленген кезде ОЦК алушыға 1414 бірыңғай байланыс орталығынан SMS-хабарлама жіберіледі. Хабарлама алған азамат оған келісімі туралы жауап беруі керек. Өтінішті рәсімдеу, әлеуметтік жәрдемақы немесе төлем тағайындау автоматты режімде іске асады. Содан кейін ақша қаражаты алушының банк шотына аударылады.
