Алдымен 11–14 қыркүйек аралығында Санкт-Петербургтегі әйгілі Чинизелли аренасында өткен «Без границ» IV Халықаралық цирк өнері фестиваліне 20 елден 170-тен астам әртіс қатысқанын айта кету керек.
Өнер майталмандарының олжасы қаншалықты салмақты екенін былай безбендеуге болады. Мәселен, Мажарстаннан келген «Тірі трапеция» – шексіз биіктегі шеберліктің шыңы болса, Қытай елі акробаттарының ғажайып ептілігі, танзаниялық төрттік, Испания жонглерлері, Ресейдің аренада өнер көрсететін 6 зебрасы мен 12 маймылы бар «Африка» аттракционы көрермендерін таңғалдырмай қоймайды. Алайда халықаралық фестивальде Алматыдан келген «Хассак» тобының жүрек жұтқандарға лайықты өнері нағыз кереметке айналды.
Қателесуді кешірмейтін өнер жолында жүрген отандастарымыз бұл трюкте 180 кг тартатын үш адамды маңдайымен көтеріп, тепе-теңдікті сақтай отырып көпірлі баспалдақпен жүріп өтеді. Кез келген цирк қайталай алмай отырған эквилибр трюктің әлі күнге дейін дүние жүзінде баламасы жоқ әрі ол «Almaty Circus Festival» кезінде ресми рекорд ретінде тіркеліп, бас жүлдені жеңіп алған еді.
– Біз өз атымыздан ғана өнер көрсеткен жоқпыз. Цирк өнеріндегі Қазақстанның да шеберлігі мен деңгейін таныттық. Көрермендердің ықыласы мен қолдауы жігерлендірді, – дейді «Хассак» тобының жетекшісі Әділет Тиканов.
Фестивальде өнер көрсеткен Қазақ мемлекеттік циркінің Әділет Тиканов жетекшілік ететін «Хассак» тобы қалың көрермен мен халықаралық қазылар алқасын тәнті етті.
Оған қоса Қазақ мемлекеттік циркінің директоры Мақсат Маратбекұлы аталған фестивальге халықаралық қазылар алқасының мүшесі ретінде шақырылып, еліміздің цирк өнерінің кәсіби өкілі ретінде мойындалғаны да мәртебе болды.
Ал қоржындағы қола жүлденің жайы төмендегідей. Санкт-Петербургтегі фестивальмен қатар сол күндері Мәскеудегі Ю.Никулин атындағы циркте тағы бір маңызды шара – «Артист» III Халықаралық цирк фестивалі өтіп, оған әлемнің 18 елінен үздік өнерпаздар қатысқан еді.
Еліміз атынан әлемдік сахналарда аты танымал жерлесіміз Таисия Демидова өнер көрсетті. Таисияның қоржынында Монте-Карлодағы халықаралық фестивальдің алтын медалі, «Идол» фестивалінің бас жүлдесі сынды басқа да салмақты марапаттар бар.
Мәскеуде өткен фестивальде Таисия тағы да кәсіби шеберлігін көрсетіп, қола жүлдеге ие болды.
АЛМАТЫ
